អង់គ្លេស៖ ក្រុមមាន់ខ្នាយមាស Tottenham Hotspur បានបរាជ័យក្នុងដីខ្លួនឯង ក្រោមថ្វីជើងក្រុមខ្លាំងអាល្លឺម៉ង់ RB Leipzig ក្នុងលទ្ធផល១-០ ក្នុងជំនួបប្រចាំក្របខណ្ឌ Champions League វគ្គ១៦ក្រុមជើងទី១ កាលពីរាត្រីថ្ងៃពុធម្សិលមិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យ៉ាងណាមិញ គ្រូបង្វឹកសញ្ជាតិព័រទុយហ្កាល់លោក Jose Mourinho យល់ឃើញថា លទ្ធផលមិនគាប់ប្រសើរកាលពីយប់មិញ គឺដោយសារតែក្រុមរបស់លោកជួបវិបត្តិខ្សែប្រយុទ្ធ ដោយកីឡាករជួរមុខ Harry Kane និង Heung Min Son របួស ដែលមើលទៅវាហាក់បីដូចជាក្រុមរបស់លោកកាន់កាំភ្លើងចូលសមរភូមិប្រយុទ្ធអត់មានគ្រាប់ចឹង។
លោក Mourinho បានថ្លែងក្រោយបញ្ចប់ការប្រកួតថា៖
និយាយឲ្យស្មោះត្រង់ចុះ ពួកគេ (កូនក្រុម) ព្យាយាមធ្វើគ្រប់យ៉ាងតាមតែអាចធ្វើបានហើយ។ ស្ថានភាពរបស់ក្រុមបច្ចុប្បន្នវាហាក់បីដូចជាកាន់កាំភ្លើងចូលប្រយុទ្ធ អត់មានគ្រាប់អ៊ីចឹង។ ខ្ញុំគិតថាប្រសិនបើយើងរកគ្រាប់បាល់បានមុនពួកគេ នោះការប្រកួតនឹងមិនមែនបែបនេះទេ។ អ្វីដែលខ្ញុំបារម្ភមិនមែនលទ្ធផល ១-០ នេះទេ ព្រោះវាមិនទាន់បញ្ចប់ ពួកយើងអាចទៅទីនោះ (ទឹកដី Leipzig) ឈ្នះក៏ថាបាន។ អ្វីដែលខ្ញុំព្រួយបារម្ភពិតបា្រកដនោះគឺកត្តាកីឡាករដែលត្រូវលេងប្រកួតបន្ទាប់ ខ្ញុំមិនដឹងថា នៅសល់ប៉ុន្មានប្រកួតទៀតទេ ដែលយើងត្រូវលេងរយៈពេល២ថ្ងៃទៀតនេះ។ ពួកយើងពិតជាមានបញ្ហា ព្រោះពួកយើងត្រូវលេង FA Cup និង Premier League ទៀត។
គួរឲ្យដឹងដែរថា សម្រាប់ការប្រកួតជើងទី២ ក្រុម Tottenham Hotspur នឹងត្រូវធ្វើដំណើរទៅកីឡដ្ឋាន Red Bull Arena ដែលជាទឹកដីរបស់ក្រុម RB Leipzig ខណៈការប្រកួតនឹងធ្វើឡើងនៅថ្ងៃទី១១ ខែមីនា ឆ្នាំ២០២០ វេលាម៉ោង៣ រំលងអាធ្រាត្រ៕
ប្រភព៖ goal
Bong I.T