យកបានដឹងតែស៊ុតផ្អើល Serie A ហើយ! Juventus សម្លឹងមើលឃើញខ្សែប្រយុទ្ធជួរមុខម្នាក់របស់ Man City

អ៊ីតាលី៖ ក្លិបសេះបង្កង់ Juventus ត្រូវបានគេរាយការណ៍មកថា បានដាក់ការចាប់អារម្មណ៍ជាខ្លាំងក្នុងការនាំយកខ្សែប្រយុទ្ធរបស់មេឃខៀវ Manchester City កីឡាករ Gabriel Jesus នៅទីផ្សារដោះដូរកីឡាកររដូវក្ដៅខាងមុខ។

ក្រោយរងបម្រាមពី​ UEFA រយៈពេលពីរឆ្នាំសម្រាប់ការបង្ហាញខ្លួននៅក្នុងព្រឹត្តិការណ៍ការប្រកួតផ្សេងៗដែលរៀបចំដោយ UEFA រួមមានទាំង Champions League ថែមទៀតនោះ អាចនឹងធ្វើឲ្យកីឡាករមួយចំនួនចាកចេញពីក្លិបជើងឯក Premier League រដូវកាលមុន នៅទីផ្សាររដូវក្ដៅខាងមុខ។

បើតាមការចុះផ្សាយរបស់កាសែតកីឡាអ៊ីតាលី Tuttonsport ក្លិប Juventus បានចាប់អារម្មណ៍ក្នុងការនាំយក​ Gabriel Jesus ដែលតម្លៃខ្លួនរបស់ខ្សែប្រយុទ្ធជម្រើសជាតិប្រេស៊ីលរូបនេះត្រូវបានគេដឹងថា Man City ចង់បានប្រមាណជា ៥៨លានផោន។ នៅរដូវកាលនេះ កីឡាករវ័យ២២ឆ្នាំរូបនេះបង្ហាញទម្រង់លេងបានយ៉ាងល្អដោយរកបាន១៦គ្រាប់ ពីការបង្ហាញខ្លួនឲ្យក្រុមលោក Pep Guardiola ៣៣ប្រកួត។

គួរឲ្យដឹងផងដែរថា Jesus បានផ្លាស់ពីក្លិប្រេស៊ីល Palmeiras មកកាន់កីឡដ្ឋាន Etihad កាលពីខែមករា ឆ្នាំ២០១៧ ក្នុងតម្លៃផ្ទេរ២៧លានផោន។ គិតមកទល់ពេលនេះ ម្ចាស់អាវលេខ៩ ចូលលេងឲ្យ Man City បាន១៣៣ប្រកួត រកគ្រាប់បាល់បាន៦១គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច២៥ដង ក្នុងនាមជាខ្សែប្រយុទ្ធកណ្ដាល៕

ប្រភព៖ SportsMole