អាល្លឺម៉ង់៖ ខ្សែប្រយុទ្ធក្រុម RB Leipzig កីឡាករ Timo Werner បានសារភាពថា ខ្លួនពិតជាមានមោទកភាព ពេលដែលលេចឮដំណឹងក្លិបហង្សក្រហម Liverpool ចាប់អារម្មណ៍ខ្លួន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ខ្សែប្រយុទ្ធវ័យ២៣ឆ្នាំ បានក្លាយជាគោលដៅរបស់ Liverpool ជាយូរណាស់មកហើយ បន្ទាប់ពីបង្ហាញទម្រង់លេងលេចធ្លោជាមួយក្រុម RB Leipzig។ យ៉ាងណាមិញក្នុងចំណោមការបង្ហាញខ្លួន៣២ប្រកួតរដូវកាលនេះ គេស៊ុតបញ្ចូលទីបាន២៦គ្រាប់។
មិនត្រឹមតែប៉ុណ្ណោះកាលពីរាត្រីថ្ងៃពុធម្សិលមិញ គេថែមទាំងស៊ុតបញ្ចូលទីបាន១គ្រាប់ជួយ Leipzig ផ្ដួលក្រុម Tottenham Hotspur ១-០ ក្នុងការប្រកួតក្របខណ្ឌ UEFA Champions League វគ្គ១៦ក្រុមជើងទី១ ថែមទៀតផង។
ក្រោយបញ្ចប់ការប្រកួត កំឡុងពេលផ្ដល់បទសម្ភាសន៍ Werner ត្រូវបានអ្នកសារព័ត៌មានសួរទាក់ទងពី ដំណឹងចចាមអារ៉ាមដែលពាក់ព័ន្ធជាមួយ Liverpool ខណៈពេលនោះ គេឆ្លើយតបយ៉ាងដូច្នេះថា៖
ខ្ញុំដឹងថា Liverpool ជាក្រុមល្អជាងគេបំផុតលើលោកនាពេលបច្ចុប្បន្ន នៅពេលដែលអ្នកមានទំនាក់ទំនងជាមួយក្រុមល្អបែបនោះវាធ្វើឲ្យខ្ញុំមានមោទកភាពណាស់។ វាពិតជារីករាយ ប៉ុន្តែខ្ញុំដឹងថា Liverpool មានកីឡាករល្អៗច្រើន ហើយដូច្នេះខ្ញុំត្រូវអភិវឌ្ឍន៍ខ្លួន និងរៀនសូត្រឲ្យបានច្រើនជាងនេះ ទើបអាចឈានដល់កម្រិតនោះ និងលេងនៅទីនោះបាន។
គួរឲ្យដឹងដែរថា Werner បានផ្លាស់មកចូលរួមជាមួយ Leipzig កាលពីឆ្នាំពីឆ្នាំ២០១៦។ គិតមកទល់ពេលនេះគេបង្ហាញខ្លួនសរុបបាន ១៤៦ប្រកួត ស៊ុតបញ្ចូលទីបាន៨៧គ្រាប់ និងបញ្ជូនបាល់ឲ្យមិត្តរួមក្រុមសម្រេចទីបាន៧ដង៕
ប្រភព៖ dailymail
Bong I.T