អនិច្ចាខ្លោចចិត្ត! ព្រោះវីរុសកូរ៉ូណា បានសម្លាប់អ្នកដឹកនាំរឿងចិនល្បីឈ្មោះម្នាក់ ស្លាប់មួយគ្រួសារ!

ចិន៖ នេះពិតជារឿងដ៏គួរឲ្យខ្លោចចិត្តបំផុតមួយ ដែលអ្នកដឹកនាំរឿងចិនល្បីឈ្មោះម្នាក់ ព្រមទាំងបងស្រី អ្នកម្តាយ និងឪពុករបស់លោក បានស្លាប់ទាំងអស់គ្នា ដោយសារតែវីរុសកូរ៉ូណា ឬ Covid-19 នៅក្នុងមជ្ឈមណ្ឌលផ្ទុកអ្នកជំងឺ ក្នុងទីក្រុង Wuhan។

នេះបើយោងតាមការរាយការណ៍ ពីទស្សនាវដ្តីចិន Caixin បានឲ្យដឹងថា អ្នកដឹកនាំរឿងជនជាតិចិនរូបនេះ មានឈ្មោះថា Chang Kai មានអាយុ៥៥ឆ្នាំ លោកបានស្លាប់បាត់បង់ជីវិតកាលពីថ្ងៃទី១៤ ខែកុម្ភៈកន្លងទៅនេះ ចំណែកឯឪពុកម្តាយរបស់លោកក៏បានទទួលទទួលមរណភាពមុនលោករយៈពេល២សប្តាហ៍ បន្ទាប់ពីពួកគេបានចំណាយពេលជួបជុំគ្នា នៅក្នុងបន្ទប់ផ្ទុកអ្នកជំងឺដាច់ដោយឡែក។ មិនតែប៉ុណ្ណោះ បន្ទាប់ពីលោក Chang Kai បានស្លាប់មិនបានប៉ុន្មានម៉ោងផង បងស្រីរបស់លោក ក៏បានស្លាប់ទៅទៀតផងដែរ ដោយឡែក នៅសល់តែភរិយារបស់លោកតែប៉ុណ្ណោះ ដែលបច្ចុប្បន្នកំពុងតែស្ថិតនៅក្នុងស្ថានភាពធ្ងន់ធ្ងរ។

គួរឲ្យដឹងផងដែរថា អត្រាមរណភាពនៅឯទីក្រុង Wuhan និងខេត្ត Hubei មានអត្រាខ្ពស់ជាងគេបំផុត បើធៀបទៅដោយតំបន់ដទៃទៀត។ អ្នកជំងឺបានរាយការណ៍មកថា ពួកគេមានភាពលំបាក់ណាស់ ក្នុងការស្វែងរកគ្រែ នៅក្នុងមន្ទីរពេទ្យដែលមានសមត្ថភាពខ្ពស់ សូម្បីតែវេជ្ជបណ្ឌិតជំនាញៗនៅទីនោះ ក៏បានស្លាប់បាត់បង់ជីវិតប៉ុន្មាននាក់ដែរ ដោយសារតែវីរុសដ៏កាចសាហាវមួយនេះ។

គួរបញ្ជាក់ផងដែរ យោងតាមទិន្នន័យចុងក្រោយ វីរុសកូរ៉ូណានេះបានឆ្លងដល់មនុស្សជាង ៧៣,០០០នាក់ហើយ និងបានសម្លាប់មនុស្សអស់ ១,៨៧៥នាក់។ មិនថាយ៉ាងណា ក៏សូមចូលរួមសោកស្តាយ ចំពោះក្រុមគ្រួសារសពរបស់អ្នកដឹកនាំរឿង Chang Kai ផងដែរ៕