កូរ៉េខាងត្បូងរកឃើញអ្នកឆ្លងវីរុសកូរ៉ូណាថ្មីចំនួន ១៥នាក់បន្ថែមទៀត ដែលនាំឱ្យចំនួនអ្នកឆ្លងសរុបក្នុងប្រទេសនេះកើនឡើងដល់ ៤៦នាក់​

កូរ៉េខាងត្បូង៖ ចំនួនអ្នកឆ្លងវីរុសកូរ៉ូណាថ្មីនៅក្នុងប្រទេសកូរ៉េខាងត្បូងបានកើនឡើងដល់​ ៤៦នាក់ ក្រោយពេលក្រុមវេជ្ជបណ្ឌិតប្រចាំប្រទេសនេះ បានធ្វើតេស្តរកឃើញវីរុសកូរ៉ូណាលើអ្នកដំណើរ ១៥ នាក់បន្ថែមទៀត។

យោងតាមគេហទំព័រសារព័ត៌មាន Yonhap បានឱ្យដឹងថា ករណី​អ្នកឆ្លងវីរុសកូរ៉ូណាថ្មីនេះមាន ១៣ នាក់​ត្រូវបានគេរកឃើញនៅ​ភាគអាគ្នេយ៍​ទីក្រុងដេហ្គូ ដែលមានចម្ងាយ​ ៣០០ គីឡូម៉ែត្រ​ពីរដ្ឋធានីសេអ៊ូល។ ចំណែក​ករណីអ្នកឆ្លងវីរុសកូរ៉ូណា ៧ នាក់ផ្សេងទៀត ត្រូវបានគេរកឃើញនៅលើនាវាកម្សាន្ត Diamond Princess ​ប្រទេសជប៉ុន​។

​មន្ត្រីសុខាភិបាល​​កូរ៉េខាងត្បូងបាននិយាយថា ​អ្នកដំណើរដែលបានឆ្លងវីរុសកូរ៉ូណានៅលើនាវាកម្សាន្ត Diamond Princess ​គឺកំពុងទទួលការព្យាបាល ហើយអ្នកជំងឺទាំងនោះនឹងត្រូវរៀបចំឱ្យ​នៅដាច់ដោយឡែកពីគ្នា ដើម្បីទប់ស្កាត់ការចម្លងវីរុសដ៏កាចសាហាវនេះទៅមនុស្សផ្សេងទៀត។

គួរបញ្ជាក់ផងដែរថា ​នាវាកម្សាន្ត Diamond Princess ​ដែលដឹកអ្នកដំណើរ​ប្រមាណ ៣.៧០០នាក់ ត្រូវបាន​អាជ្ញាធរប្រទេសជប៉ុនរៀបចំដាក់ឱ្យនៅដាច់ដោយឡែក​​​កាលពីថ្ងៃទី ៣ ខែកុម្ភៈ បន្ទាប់ពីគេបានរកឃើញថា អតីតអ្នកដំណើរម្នាក់ ដែលបានចុះពីកប៉ាល់នេះមានផ្ទុកវីរុសកូរ៉ូណា។​ ហើយក្នុងនោះដែរ មាន​អ្នកដំណើរ​យ៉ាងហោចណាស់ ​៥៤២ នាក់បានឆ្លងវីរុសនេះ ​ដែលអ្នកនាំឱ្យចំនួនករណីអ្នកឆ្លងវីរុសកូរ៉ូណានៅក្នុងប្រទេសជប៉ុនបានកើនឡើងដល់​ ៦១០ នាក់​​៕