ចិន៖ យោងតាមសារព័ត៌មាន Shanghai.ist ចុះផ្សាយថា កាលពីថ្ងៃច័ន្ទម្សិលមិញនេះ នាយកដ្ឋានអង្គភាពនៃគណៈកម្មាធិការក្នុងទីក្រុងវូហាន បានប្រកាសពីវិធានការមួយចំនួនដែលខ្លួននឹងធ្វើដើម្បីជួយដល់ក្រុមគ្រួសារនៃបុគ្គលិកពេទ្យដែលបានឆ្លងវីរុស ឬស្លាប់ដោយសារ COVID-19។ វិធានការមួយក្នុងចំណោមវិធានការទាំងនោះគឺ ការបង់ប្រាក់ឲ្យបុគ្គលិកពេទ្យដែលបានឆ្លងវីរុសក្នុងម្នាក់ចំនួន ៣,០០០ យ័ន (៤២៩ ដុល្លារ) ខណៈគ្រូពេទ្យដែលស្លាប់នឹងទទួលបាន ៥,០០០ យ័ន (៧១៦ ដុល្លារ)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យ៉ាងណាមិញ ក្រោយបានដឹងពីចំនួនទឹកប្រាក់បណ្ដោះអាសន្ននេះ មានអ្នកលេងអុីនធឺណិតជាច្រើនបានសម្ដែងការមិនពេញចិត្តរបស់ខ្លួននៅលើវេបសាយមួយរបស់ចិន។ ក្នុងចំណោមនោះ មានម្នាក់បានបញ្ចេញមតិ និងចោទជាសំនួរថា៖
គួរអោយសោកស្ដាយណាស់! ទឹកប្រាក់ចំនួនប៉ុននេះមិនសមនោះឡើយ។ តើបាត់លេខសូន្យប៉ុន្មានខ្ទង់មែនទេ? ហើយតើជីវិតរបស់វេជ្ជបណ្ឌិតសព្វថ្ងៃមានតម្លៃត្រឹមតែប្រាក់ ៥,០០០ យ័ន?
ផ្ទុយពីនេះ ក៏មានអ្នកលេងអុីនធឺណិតម្នាក់ទៀតបាននិយាយទាំងអួលដើមករថា៖
វាមិនច្រើនទេ តែវាប្រសើរជាងមិនបានអ្វីសោះ។
សូមបញ្ជាក់ថា កាលពីសហ្ដហ៍មុន ប្រទេសចិនបានបង្ហាញឲ្យដឹងពីចំនួនបុគ្គលិកពេទ្យជាង ១,៧០០ នាក់បានឆ្លងវីរុស និងចំនួន ៦ នាក់ទៀតបានស្លាប់ដោយសារវីរុសនេះ ក្នុងនោះរួមមានលោក Li Wenliang ដែលជាវេជ្ជបណ្ឌិតម្នាក់ដែលបានទម្លាយរឿងវីរុសនេះមុនគេផងដែរ៕
Bong I.T