នាយករដ្ឋមន្រ្តីថៃ លោកប្រាយុទ្ធគ្រោងបន្ថែមការឈប់សម្រាករយៈពេល ៩ ថ្ងៃសម្រាប់ការប្រារព្ធពិធីចូលឆ្នាំថ្មីរបស់ថៃ។ ការផ្តើមគំនិតនេះ កំពុងត្រូវបានពិភាក្សាពីមន្ត្រីពាក់ព័ន្ធ។
លោកប្រាយុទ្ធ ចានអូចា បានថ្លែងកាលពីថ្ងៃច័ន្ទថា រដ្ឋាភិបាលថៃកំពុងពិចារណាថានឹងបន្ថែមថ្ងៃឈប់ចំនួន ២ថ្ងៃបន្ថែមទៀតក្នុងឱកាសពិធីបុណ្យសង្ក្រាន្តដើម្បីកៀងគរភ្ញៀវទេសចរមកវិញ ខណៈការផ្ទុះនៃវីរុស COVID-19 បានធ្វើអោយភ្ញៀវមកកំសាន្តនៅថៃធ្លាក់ចុះជាខ្លាំង។
គួរបញ្ជាក់ថា កម្មវីធីសង្ក្រាន្តរបស់ថៃកន្លងមកមានរយៈពេល៥ថ្ងៃរាប់បញ្ចូលទាំងថ្ងៃសៅរ៍ និងថ្ងៃអាទិត្យសប្តាហ៍ទី២ និងប្រារព្ឋឡើងចាប់ពីថ្ងៃទី ១៣ឬ១៥ ក្នុងសប្តាហ៍ទី៣ នាខែមេសាជារៀងរាល់ឆ្នាំ។
លោកឧបនាយករដ្ឋមន្រ្តី Somkid Jatusripitak បានផ្តើមគំនិតទាក់ទងនឹងការបន្ថែមថ្ងៃសង្ក្រាន្តនៅឆ្នាំនេះ ដោយបន្ថែមថ្ងៃព្រហស្បតិ៍ និងថ្ងៃសុក្រដែលនឹងធ្វើអោយកម្មវីធីប្រពៃណីមួយនេះ មានថ្ងៃឈប់សម្រាករហូត៩ ថ្ងៃ (ថ្ងៃទី ១១-១៩ ខែមេសា) ។
លោកបានមានប្រសាសន៍ទៀតថា រយៈពេលវែងបែបនេះនឹងជំរុញឱ្យប្រជាជនកាន់តែច្រើនធ្វើដំណើរមកកំសាន្ត ប្រទេសមួយនេះ និងចំណាយលុយកាន់តែច្រើនមកលើវីស័យទេសចរណ៍របស់ថៃបន្ទាប់ពីការធ្លាក់ចុះយ៉ាងខ្លាំងនៃចំនួនភ្ញៀវទេសចរមកពីប្រទេសចិនដោយសារការផ្ទុះឡើងនៃផ្ទុះនៃវីរុស COVID-19។
យោងតាមផែនការខាងលើ ការបន្ថែមរយៈពេលពីរថ្ងៃទៅលើថ្ងៃសង្ក្រាននេះនឹងត្រូវបានកាត់កងជាមួយ និងថ្ងៃសំរាកផ្សេងទៀតរបស់ឆ្នាំ២០២០នេះផ្ទាល់តែម្តង។ ជាការកត់សម្គាល់ វិស័យទេសចរណ៍របស់ថៃមានចំនួន ២០ ភាគរយនៃGDPសរុបក្នុងស្រុករបស់ប្រទេសនេះ ហើយបង្កើតការងារចំនួន ២ លានកន្លែង៕