ចិន៖ ធនាគារកណ្តាលសាខាក្វាងចូវក្នុងប្រទេសចិនបានប្រកាសថា ខ្លួននឹងបំផ្លាញចោលនូវរាល់ក្រដាសប្រាក់មួយចំនួន ដែលធ្លាប់ចរាចរណ៍នៅក្នុងមន្ទីរពេទ្យ ទីផ្សារលក់សាច់សត្វ និងនៅតាមចំណត់រថយន្តក្រុង ដើម្បីធានាបាននូវសុវត្ថិភាពក៏ដូចជាចូលរួមជួយប្រយុទ្ធប្រឆាំងនឹងការផ្ទុះឡើងនៃវីរុសកូរ៉ូណា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកាសែតហិរញ្ញវត្ថុ Caixin បានរាយការណ៍កាលពីថ្ងៃសៅរ៍ថា មន្ត្រីនៅធនាគារប្រជាជនចិន (PBOC) ដែលជាសាខានៅភាគខាងត្បូងទីក្រុងបានបញ្ជាឱ្យដកចេញនូវរាល់ក្រដាសប្រាក់ទាំងអស់ ដែលធ្លាប់បានប្រើប្រាស់ក្នុងវិស័យទាក់ទងនឹងការចម្លងវីរុសកូរ៉ូណា គឺតែត្រូវយកទៅបំផ្លាញចោល។ ហើយក្នុងនោះដែរ ធនាគារពាណិជ្ជកម្មនៅក្នុងខេត្តទាំងអស់ ក៏គួរតែដកក្រដាសប្រាក់ដែលធ្លាប់ចរាចរណ៍ក្នុងទីផ្សារខាងលើយកទៅដាក់ឱ្យដាច់ដោយឡែក ហើយយកវាទៅសំលាប់មេរោគរួចបញ្ជូនវាទៅឱ្យ PBOC វិញ។
យោងតាមកាសែតហិរញ្ញវត្ថុ Caixin បានឱ្យដឹងទៀតថា ក្រដាសប្រាក់ដែលប្រមូលបានទាំងអស់នឹងត្រូវយកទៅសំងួតដោយប្រើសីតុណ្ហភាពខ្ពស់ឬកាំរស្មី UV ដើម្បីសំលាប់មេរោគដែលមាននៅលើក្រដាសប្រាក់ទាំងនោះ បន្ទាប់មកដាក់វាទុកដាច់ដោយឡែករយៈពេល១៤ថ្ងៃ មុនពេលដាក់ឱ្យចររាចរណ៍ឡើងវិញ។ ហើយក្នុងនោះដែរ ធនាគារកណ្ដាលក៏នឹងប្រមូលកាក់រួមជាមួយនឹងក្រដាសប្រាក់ចាស់ៗ យកទៅបំផ្លាញចោលជាថ្នូរនឹងក្រដាសប្រាក់ថ្មី។ ធនាគារកណ្ដាលក៏បានបញ្ជាក់ផងដែរថា ការធ្វើបែបនេះគឺមិនប៉ះពាល់ដល់ការផ្គត់ផ្គង់ក្រដាសប្រាក់នោះទេ ប៉ុន្តែផ្ទុយទៅវិញ វាអាចជួយរក្សាបរិមាណរូបិយប័ណ្ណដែលអាចប្រើប្រាស់បាន៕