គ្នាយើងប្រាកដជាដឹងហើយថា ការទំពាអាហារម៉ត់ល្អមានប្រយោជន៍ដល់ប្រព័ន្ធរំលាយអាហារ ជួយឱ្យរាងកាយស្រូបយកជីវជាតិវីតាមីនបានគ្រប់គ្រាន់។ តែយ៉ាងណាមិញយើងអាចនឹងភ្លេច ឬបង្កើតទម្លាប់លេបអាហារចូលដោយពុំបានទំពាត្រឹមត្រូវ ដោយសារកត្តាមួយចំនួនដូចជា ករណីប្រញាប់ ឬទម្លាប់ញ៉ាំអាហារធំៗ ឬតូចពេក ដូចនេះគ្នាយើងអាចស្វែងយល់ និងដឹងពីរបៀបទំពាអាហារបានល្អដូចខាងក្រោមនេះ៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. អត្ថប្រយោជន៍នៃការទំពាអាហារតាមសម្រួល
គ្រូពេទ្យជំនាញបាននិយាយថា កាលណាយើងញ៉ាំអាហារលឿនពេក នោះយើងនឹងមានទំនោរញ៉ាំច្រើន។ ការញ៉ាំអាហារដោយទំពាច្រើនដង ជួយឱ្យឆាប់ឆ្អែត និងបន្ថយបរិមាណអាហារមិនចាំបាច់ ដែលយើងត្រូវទទួលបាន ពោលគឺមិនធ្វើឱ្យមានបញ្ហាលើសគីឡូ។ ក្នុងការសិក្សាមួយ ទៅលើស្ត្រីស្ម័គ្រចិត្ត៣០នាក់ ដែលមានទម្លាប់ទំពាអាហារផ្សេងៗគ្នាបានបង្ហាញឱ្យឃើញថា អ្នកដែលញ៉ាំអាហារយឺតដោយសារការទំពា គឺឆាប់ឆ្អែតជាងស្ត្រីដែលមានទម្លាប់ញ៉ាំលឿន។ ហើយករណីសិក្សាមួយទៀតនោះ បានបង្ហាញឱ្យឃើញថា អ្នកទម្លាប់ញ៉ាំអាហារយូរ មានអត្រាឃ្លានញ៉ាំចំណីក្រៅពេល តិចតួចបំផុត។ ជាមួយគ្នានោះផងដែរ អ្នកជំនាញបានបញ្ជាក់ថា ទំពាអាហារបានម៉ត់ល្អ ពិតជាជួយឱ្យរាងកាយ ស្រូបយកជីវជាតិចិញ្ចឹមបានយ៉ាងល្អ។
២. ការទំពាអាហារបានម៉ត់ល្អ
- កុំដាក់អាហារ ឬម្ហូបធំលើសពីទំហំស្លាបព្រា (អាហារច្រើន ពិបាកទំពាសព្វល្អ)។
- ពេលអាហារក្នុងមាត់ ចាប់ផ្តើមទំពា ក្នុងនោះ ការទំពាល្អបំផុត គឺប្រមាណ៣២ដង រហូតដល់អាហារក្នុងមាត់ អស់រសជាតិ នោះជាពេលល្អដែលត្រូវលេបចូល។
ករណីមួយទៀត ដែលគ្នាយើងគួរដឹង គឺករណីអ្នកមានបញ្ហាប្រព័ន្ធរំលាយអាហារ ពុំគួរហូបបណ្តើរ និងពិសាទឹកបណ្តើរជាមួយគ្នានោះទេ ព្រោះទឹកនឹងទៅពង្រាវអង់ស៊ីមដែលជាចំណែកសំខាន់ក្នុងការរំលាយអាហារ។