អ្នកវិទ្យាសាស្ត្រ រកឃើញមេរោគ​មួយប្រភេទនៅក្នុង​ឆ្អឹងដាយណូស័រ ដែលមានអាយុកាលជាង ៦៦លានឆ្នាំ​មុន​

បរទេស៖ ​មេរោគមួយប្រភេទដែលនៅតែអាចជះឥទ្ធិពលដល់មនុស្សសព្វថ្ងៃនេះ ត្រូវបានគេរកឃើញនៅក្នុងផូស៊ីលកន្ទុយដាយណូស័រ ដែលធ្លាប់មានវត្តមានលើផែនដីកាលពី​ ៦៦លានឆ្នាំមុន។

មេរោគនេះត្រូវបាន​ក្រុមវិទ្យាសាស្ត្ររកឃើញនៅក្នុងឆ្អឹង​របស់ដាយណូស័រវ័យក្មេងមួយ ដែល​គេបាន​ធ្វើកំណាយនៅក្នុងទីក្រុង Alberta ប្រទេសកាណាដា។ ហើយនៅក្នុងនោះដែរ ក្រុមវិទ្យាសាស្ត្របានកំណត់អត្តសញ្ញាណ​មេរោគនេះថាជាកោសិកា Langerhans histiocytosis (LCH) ដែលវាគឺជាកោសិកាកម្រមួយប្រភេទ​​​អាចបង្កជាជម្ងឺមហារីក។

លោក Hila May ដែលជាសាស្ត្រាចារ្យផ្នែកកាយវិភាគសាស្ត្រនិងនរវិទ្យាមកពីសាកលវិទ្យាល័យ Tel Aviv បាននិយាយថា៖  នេះជាលើកដំបូងហើយ ដែលពួកយើងអាចរកឃើញមេរោគនេះ​នៅក្នុងឆ្អឹងដាយណូស័រ។ ​ហើយការរកឃើញនេះ វានឹងអាចជួយពួកយើងក្នុងការសិក្សាអំពីការវិវត្ត​​​របស់វា។

លោកសាស្ត្រាចារ្យ Israel Hershkovitz ដែលមកពីសាកលវិទ្យាល័យ Tel Aviv ​ក៏បាននិយាយផងដែរថា៖ យើងកំពុងព្យាយាមស្វែងយល់បន្ថែមពីមូលហេតុដែលមេរោគមួយចំនួនអាចរស់រានមានជីវិត និងធ្វើការវិវឌ្ឍន៍​ខ្លួនរហូតមកដល់ពេលនេះ ហើយដូច្នេះវានឹងងាយស្រួលសំរាប់ពួកយើង​ក្នុងការស្វែងរកវិធីថ្មី ដែលមានប្រសិទ្ធភាពក្នុងការព្យាបាល។