បាល់លងដល់ជើងភ្លាម កាប់១ជើងចូលទីភ្លែត! Young ស៊ុតគ្រាប់ដំបូងរបស់ខ្លួនអស្ចារ្យណាស់ ប៉ុន្តែ Inter បានត្រឹមទឹកភ្នែក (មានវីដេអូ)

អ៊ីតាលី៖ ខ្សែការពារសញ្ជាតិអង់គ្លេសកីឡាករ Ashley Young បានរកគ្រាប់ដំបូងរបស់ខ្លួនឲ្យក្រុម Inter Milan ក្នុងជំនួបទល់នឹងក្រុម Lazio កាលពីរាត្រីថ្ងៃអាទិត្យម្សិលមិញ ដែលជាការប្រកួតប្រចាំក្របខណ្ឌ Serie A សប្ដាហ៍ទី២៤។

ខ្សែការពារវ័យ៣៤ឆ្នាំ បានផ្លាស់ពីក្រុមបិសាចក្រហម Manchester United មករួមរស់ជាមួយក្រុម Inter Milan ដែលដឹកនាំដោយគ្រូបង្វឹកសញ្ជាតិអ៊ីតាលីលោក Antonio Conte កាលពីទីផ្សារដោះដូរខែមករាកន្លងទៅ ក្នុងតម្លៃផ្ទេរ ១,៥លានដុល្លារ អមជាមួយកិច្ចសន្យារយៈពេល៦ខែ។

ហើយកាលពីយប់មិញនេះ នៅកីឡដ្ឋាន Stadio Olimpico អតីតជម្រើសជាតិអង់គ្លេស Young បានស៊ុតបើកឆាកនាំមុខឲ្យក្រុមលោក Conte នៅចុងតង់ទី១ នាទីទី៤៤។

លុះឈានចូលដល់តង់ទី២ ក្រុម Lazio បានផ្លាស់ប្ដួរយុទ្ធសាស្រ្តលេង សម្រុកវាយបកបានគ្រាប់មកវិញ ធ្វើបានដោយខ្សែប្រយុទ្ធ Ciro Immobile នៅនាទីទី៥០ និងខ្សែបម្រើសញ្ជាតិស៊ែប៊ី Sergej Milinkovic-Savic នៅនាទីទី៦៩។ ដូច្នេះក្រោយបញ្ចប់៩០នាទី ក្រុមម្ចាស់ផ្ទះ Lazio បានយកឈ្នះក្រុមភ្ញៀវ Inter Milan ក្នុងលទ្ធ២ទល់នឹង១។

ក្រឡេកមកមើលតារាងពិន្ទុនាពេលបច្ចុប្បន្នវិញ ឃើញថាមានការប្រដេញពិន្ទុគ្នាប្រកៀកប្រកិតមែនទែន។ ពោលគិតត្រឹមសប្ដាហ៍ទី២៤នេះ ក្រុម Juventus ឡើងមកគ្រងកំពូលតារាងបណ្ដោះអាសន្ន បន្ទាប់ពីយកឈ្នះក្រុម Brescia ២-០ កាលពីយប់មិញ មាន៥៧ពិន្ទុក្នុងដៃ រក្សាគម្លាតពីក្រុមលេខ២ Lazio ១ពិន្ទុ និងក្រុមលេខ៣ Inter Milan តែ៣ពិន្ទុប៉ុណ្ណោះ៕

បើចង់ឃើញការស៊ុតបញ្ចូលទីរបស់ Ashley Young អស្ចារ្យ​យ៉ាងណានោះ សូមទស្សនាវីដេអូខាងក្រោម៖