តោះ! មកស្គាល់បុរសម្នាក់ ដែលជាដើមចមធ្វើឲ្យ Man City ទឹកភ្នែក មិនបានលេង UCL ២ឆ្នាំ

អង់គ្លេស៖ ក្លិបបាល់ទាត់​ Manchester City ត្រូវបានសមាគមបាល់ទាត់អឺរ៉ុប ហៅកាត់ថា UEFA សម្រេចព្យួរឈ្មោះ មិនឲ្យចូលប្រកួតក្នុងព្រឹត្តការណ៍បាល់ទាត់ទ្វីបអឺរ៉ុបសំខាន់ៗចំនួន២ឆ្នាំ ដោយសារត្រូវបានរកឃើញថាល្មើសនឹងច្បាប់​ Financial Fair Play។

ខណៈដើមហេតុនៃករណីខាងលើ ត្រូវបានកាសែត The Sun បញ្ជាក់ថា គឺកើតឡើងមកពី Hacker សញ្ជាតិព័រទុយហ្កាល់ម្នាក់ មានឈ្មោះថា Rui Pinto។

លោក Pinto បានលួច Hack ចូល E-mail របស់ក្លិប Man City កាលពីឆ្នាំ ២០១៥ បន្ទាប់មកលោកបាន ទម្លាយឯកសារសម្ងាត់ជាច្រើនរបស់ក្លិប ដោយបង្ហោះចែកចាយនៅលើប្រព័ន្ធផ្សព្វផ្សាយ។ ហើយចាប់តាំងពីពេលនោះមក ខាង UEFA ក៏ចាប់ផ្ដើមបើកការស៊ើបអង្កេតទៅលើហិរញ្ញវត្ថុរបស់ ក្លិប Man City តែម្ដង។

បើទោះបីជាលោក Pinto ត្រូវបានអ្នកស្នេហាវិស័យបាល់ទាត់ភាគច្រើន ជុំវិញពិលោកសរសើរពីទង្វើរបស់លោកក៏ដោយ ប៉ុន្តែបើយោងតាមរបាយការណ៍របស់ The Football Leaks Scandal បុរសវ័យ៣១ឆ្នាំ ត្រូវបានគេឃាត់ខ្លួន និងបញ្ជូនទៅពន្ធនាគារហើយ ដោយកំពុងរង់ចាំការកាត់ក្ដីរបស់តុលាការជុំវិញទោសកំហុសរបស់គាត់។

គួរឲ្យដឹងដែរថា​ សម្រាប់ទោសកំហុសរបស់​ Man City ខាង UEFA ក៏បានពិន័យជាប្រាក់សុទ្ធចំនួន ៣០លានផោន (ឬប្រមាណ ៣២.៥ លានដុល្លារ) ផងដែរ៕

ប្រភព៖ AF