ថ្នាំប្រភេទខ្លះមានរសជាតិល្វីង ទើបក្មេងៗមិនចូលចិត្តញ៉ាំនោះទេ ឲ្យតែដល់ពេលបញ្ចុកម្តងៗពិបាកទាំងអ្នកញ៉ាំពិបាកទាំងអ្នកបញ្ចុក។ ដើម្បីដោះស្រាយបញ្ហាមួយនេះ លោកស្រីវេជ្ជបណ្ឌិតឯកទេសរោគកុមារ បម្រើការងារនៅមជ្ឈមណ្ឌលវេជ្ជសាស្ត្រសិង្ហបុរី គុជ ឆោមដាលីន នឹងចែករំលែកគន្លឹះល្អៗក្នុងការបញ្ចុកថ្នាំកូនមួយចំនួនខាងក្រោមនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. ត្រូវត្រៀមលក្ខណៈ
ពេលកូនឈឺយើងត្រូវត្រៀមលក្ខណៈជាមុន និងត្រូវដឹងពីចំណង់ចំណូលចិត្តរបស់កូន តើកូនចូលចិត្តញ៉ាំថ្នាំប្រភេទម្សៅ ឬក៏ប្រភេទទឹក? ចូលចិត្តរសជាតិបែបណា? នៅពេលទៅពេទ្យយើងអាចសួររកប្រភេទថ្នាំដែលកូនចូលចិត្ត នោះទើបមិនពិបាកបញ្ចុកថ្នាំកូន។
២. ត្រូវចេះសម្រួលអារម្មណ៍
ពេលបញ្ចុកថ្នាំកូនត្រូវសម្រួលអារម្មណ៍ទាំងម្តាយទាំងកូន មិនត្រូវភ័យស្លន់ស្លោនោះទេ បើយើងភ័យធ្វើឲ្យកូនមានអារម្មណ៍ភ័យខ្លាចដូចគ្នា។ យើងមិនត្រូវចាត់ទុកការបញ្ចុកថ្នាំកូនជាកិច្ចការដ៏លំបាក ញ៉ាំទៅកូនឈ្លក់ ញ៉ាំទៅក្អួតចេញមកវិញនោះទេ ត្រូវសម្រួលអារម្មណ៍ បញ្ចុកថ្នាំកូនដោយសន្សឹមៗ។
ក្មេងដូចយើងមនុស្សចាស់ដែរ មិនចូលចិត្តបង្ខំទេ រឹតតែមិនចូលចិត្តឲ្យយើងចាប់បញ្ច្រកថ្នាំ ផ្ទុយទៅវិញក្មេងចូលចិត្តលេង ហើយចូលចិត្តអ្វីដែលសាមញ្ញៗ។ អ៊ីចឹងហើយយើងត្រូវនិយាយពាក្យផ្អែមល្ហែមទៅកូន ចៀសវាងការចាប់បង្ខំ ដូចជា ចាប់ក្បាល ចាប់ច្របាច់ច្រមុះ ឬមាត់កូន។
៣. តិចនិកនៃការជ្រើសរើស និងឲ្យថ្នាំទៅកូន
បើកូននៅជាទារក អាយុក្រោម១ឆ្នាំ យើងត្រូវប្រើសឺរ៉ាំងបញ្ចុកថ្នាំកូនដែលមានទំហំតូចបំផុត ដោយបីកូន រួចបាញ់ថ្នាំបញ្ចូល ធ្វើយ៉ាងណាឲ្យថ្នាំនៅចន្លោះថ្ពាល់ និងអញ្ចាញធ្មេញរបស់កូន ដើម្បីកុំឲ្យកូនឈ្លក់ ឬខ្ពុលថ្នាំចេញមកក្រៅ។ ចំណែកឯការបាញ់ថ្នាំវិញ យើងត្រូវបាញ់ថ្នាំម្តងបន្តិចៗ មិនត្រូវបាញ់ដោយបង្ខំនោះទេ។ចំណែកវិធីមួយទៀត ម៉ាក់ៗអាចប្រើក្បាលដោះដបទឹកដោះគោចេញពីកំប៉ុង ដាក់ឲ្យកូនជញ្ជក់ រួចយកសឺរ៉ាំងបាញ់បញ្ចូលក្នុងក្បាលដោះម្តងបន្តិចៗ។ ចំពោះក្មេងធំ យើងអាចប្រើសឺរ៉ាំងបញ្ចុកថ្នាំដូចក្មេងតូចក៏បាន ឬប្រើស្លាបព្រា។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
Bong I.T