អេស្ប៉ាញ៖ បើតាមសេចក្ដីរាយការណ៍បានឲ្យដឹងថា ក្លិបអធិរាជស Real Madrid កំពុងតែពិចារណាក្នុងការចំណាយប្រាក់ ១២៣លានដុល្លារដើម្បីទិញផ្ដាច់កុងត្រាកីឡាករខ្សែប្រយុទ្ធ Lautaro Martinez ពីក្លិបយក្សអ៊ីតាលី Inter Milan។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែប្រយុទ្ធវ័យ២២ឆ្នាំ រកគ្រាប់បាល់បាន ១៦គ្រាប់ពីការបង្ហាញខ្លួនសរុប ២៧លើកឲ្យ Inter Milan នៅរដូវកាល ២០១៩-២០២០ ហើយក៏ត្រូវបានគេដឹងថាគឺជាគោលដៅយ៉ាងសំខាន់មួយរូបដែលក្លិប Barcelona ចង់បានជាខ្លាំងនៅទីផ្សារដោះដូរកីឡាកររដូវក្ដៅខាងមុខ ដោយក្លិបមានមូលដ្ឋាននៅតំបន់កាតាឡាន់ចាត់ទុកខ្សែប្រយុទ្ធជម្រើសជាតិអាហ្សង់ទីនរូបនេះជាបេក្ខភាពទីមួយដែលអាចជំនួស Luis Suarez។
យ៉ាងណាមិញ បើតាមប្រភពពី TyC Sports ក្លិប Real Madrid បានដាក់ការចាប់អារម្មណ៍មកលើមិត្តរួមក្រុមជម្រើសជាតិរបស់ Messi ម្នាក់នេះ ហើយកំពុងតែគិតគូក្នុងការដាក់សំណើក្នុងទំហំទឹកប្រាក់ ១២៣លានដុល្លារដើម្បីនាំយករូបគេមកលេងនៅទឹកដីអេស្ប៉ាញសម្រាប់រដូវកាលក្រោយ។ អ្នកចាត់ការទូទៅ Real Madrid លោក Zidane ចង់ពង្រឹងតំបន់ប្រយុទ្ធរបស់ក្រុមឡើងវិញ ក្រោយការនាំចូលកីឡាករ Luka Jovic នៅមិនទាន់អាចបំពេញតម្រូវការរបស់ក្រុមបាននៅឡើយ។
គួរឲ្យដឹងផងដែរថា ក្រៅពីក្លិបយក្សអេស្ប៉ាញទាំងពីរ Real Madrid និង Barcelona ខ្សែប្រយុទ្ធជួរមុខរបស់លោក Antonio Conte កីឡាករ Lautaro Martinez ក៏ទទួលបានការចាប់អារម្មណ៍ពីក្លិបបិសាចក្រហម Manchester United ផងដែរ៕
ប្រភព៖ SportsMole