ពីរនាក់នោះជានរណា? Man UTD រៀបគម្រោងចាយលុយធំ ១៦០លាន ដើម្បីទិញយកកីឡាករឆ្នើម២រូបនេះ

អង់គ្លេស៖ អ្នកចាត់ការទូទៅរបស់ Manchester United លោក Ole Gunnar Solskjaer ត្រូវបានគេរាយការណ៍មកថាបានចាប់អារម្មណ៍ក្នុងការនាំយកកីឡាករ២រូបគឺ Jack Grealish និង James Maddison នៅទីផ្សាររដូវក្ដៅខាងមុខ ដោយគ្រោងនឹងចំណាយប្រាក់ប្រមាណជា ១៦០លានដុល្លារ។

អ្នកចាត់ការទូទៅសញ្ជាតិន័រវែសរូបនេះបាននឹងសម្លឹងមើលកម្លាំងមួយចំនួនដើម្បីពង្រឹងគុណភាពរបស់ក្រុមឡើងវិញ ដោយបច្ចុប្បន្ន Man UTD កំពុងតែដាច់ពិន្ទុពីក្រុមកំពូលតារាងទាំង៤ ចំនួន៦ពិន្ទុ នៅក្នុងក្របខណ្ឌ Premier League។

បើតាមការចុះផ្សាយរបស់ The Sun បានសរសេររៀបរាប់ថាលោក Solskjaer បានដាក់គោលដៅទៅលើប្រធានក្រុមរបស់ Aston Villa កីឡាករ Jack Grealish និងខ្សែបម្រើឆ្នើមរបស់ Leicester កីឡាករ James Maddison ហើយលោកសង្ឃឹមថាពួកគេទាំងពីរនឹងអាចចាប់ដៃក្នុងការជួយក្រុមរបស់លោក។

ប្រភពដដែលបានបន្តឲ្យដឹងទៀតថា Man UTD អាចនឹងមានទឹកប្រាក់គ្រប់គ្រាន់សម្រាប់ការចំណាយក្នុងការនាំយកកីឡាករទាំងពីររូបនេះមកកាន់កីឡដ្ឋាន Old Trafford បើសិនជាក្លិបអាចលក់ Pogba ចេញ ខណៈមកទល់នឹងពេលនេះខ្សែបម្រើជម្រើសជាតិបារាំង Pogba នៅមិនទាន់អាចចូលលេងបាននៅឡើយ ក្រោយមានបញ្ហរបួសកាលពីខែធ្នូកន្លងទៅ។

នៅរដូវកាលនេះ Grealish និង Maddison បានបង្ហាញទម្រង់លេងយ៉ាងល្អឲ្យក្រុមរបស់គេរៀងៗខ្លួន និងកំពុងតែក្លាយជាគោលដៅក្នុងការនាំចូលរបស់បណ្ដាក្លិបធំៗនៅអឺរ៉ុប។

គួរបញ្ជាក់ផងដែរថា នៅកំឡុងទីផ្សារដោះដូរកីឡាករខែមករាដែលទើបតែកន្លងផុតទៅថ្មីៗនេះ Man UTD ទើបតែចំណាយលុយ ៦៨លានផោនក្នុងការទិញយកកីឡាករខ្សែបម្រើ Bruno Fernandes ពីក្លិប Sporting Lisbon៕

ប្រភព៖ DailyMail