ប្រមុខរាជរដ្ឋាភិបាលកម្ពុជា សម្តេចហ៊ុន សែន បានស្នើសុំប្រធានាធិបតីកូរ៉េ ឲ្យសង់ស្ពានឆ្លងកាត់ទន្លេមេគង្គពីតំបន់ជ្រោយចង្វារ ទៅកាន់ស្វាយជ្រុំ និងតំបន់អរិយក្ស ខណៈកម្ពុជា និងកូរ៉េនៅមិនទាន់មានស្ពានមិត្តភាពកម្ពុជា-កូរ៉េនៅឡើយទេ។ ការថ្លែងរបស់ប្រមុខរដ្ឋាភិបាលយ៉ាងដូច្នេះ ធ្វើឡើងក្នុងពិធីបើកការដ្ឋានស្តារ និងសាងសង់ផ្លូវលេខ២ និងលេខ២២ នៅព្រឹកថ្ងៃទី១១ ខែកុម្ភៈនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសម្ដេចហ៊ុន សែន បានបញ្ជាក់ថា៖ «ខ្ញុំបាននិយាយផ្ទាល់ជាមួយឯកឧត្ដម មូនជេ អ៊ីន ប្រធានាធិបតីសាធារណរដ្ឋកូរ៉េតែម្តង ខ្ញុំថាឯកឧត្តម កម្ពុជាមានស្ពានមិត្តភាពកម្ពុជា-ជប៉ុន ស្ពានមិត្តភាពកម្ពុជា-ចិន។ ក៏ប៉ុន្តែនៅមិនទាន់មានស្ពានមិត្តភាពកម្ពុជា-កូរ៉េ។”
នាយករដ្ឋមន្ត្រីបន្តថា នៅចុងខែកុម្ភៈខាងមុខ ប្រធានអង្គការ KOICA នឹងមកទស្សនកិច្ចនៅកម្ពុជា ហើយនឹងទៅមើលកន្លែងសាងសង់ស្ពានតែម្តង ព្រោះថាឥឡូវនឹងតំបន់អរិយក្ស ជាតំបន់ដែលអភិវឌ្ឍន៍។ សម្តេចថា កូរ៉េបានផ្តល់កម្ចីហិរញ្ញប្បទានមកកម្ពុជាឆ្នាំ២០១៩-២០២៣ចំនួន៧០០លានដុល្លារ។ ដូច្នេះថវិកាទាំងនោះ ជាចំណុចអាទិភាពដល់កម្ពុជាដើម្បីស្នើសុំបែងចែកថវិកានៃឥណទានសម្រាប់ផ្តល់កម្ពុជាលើគម្រោងស្ពាននោះតែម្តង។
ជាមួយគ្នានោះដែរ សម្តេចបានបន្ថែមថា បើប្រជាកសិករ ធ្វើការផលិត និងទទួលបានផលហើយ តែគ្មានផ្លូវដឹកជញ្ជូនទេ ក៏មិនអាចដោះស្រាយបានទេសម្រាប់ជីវភាពប្រជាជននោះ។
សូមបញ្ជាក់ថា គម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ២២ មានប្រវែងសរុប ៧២,១៧គីឡូម៉ែត្រ ដែលក្នុងនោះ ផ្លូវជាតិលេខ២ ចាប់ពីរង្វង់មូលតាខ្មៅ ដល់អូរចំបក់ មានប្រវែង ៦២,៥៦គីឡូម៉ែត្រ (ដោយឆ្លងកាត់រាជធានីភ្នំពេញ ប្រវែង៥,៤គីឡូម៉ែត្រ ខេត្តកណ្ដាលប្រវែង ១៤,២១គីឡូម៉ែត្រ និងខេត្តតាកែវប្រវែង ៥២,៥៦គីឡូម៉ែត្រ) និងផ្លូវជាតិលេខ២២ ពីអូរចំបក់ ដល់អង្គតាសោម មានប្រវែង ៩,៦១គីឡូម៉ែត្រ។
គម្រោងនេះគ្រោងចំណាយថវិកាសរុបប្រមាណ ៥៦,១លានដុល្លារអាម៉េរិក ជាហិរញ្ញប្បទានពីរដ្ឋាភិបាលសាធារណរដ្ឋកូរ៉េ រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតមីន យុទ្ធភ័ណ្ឌមិនទាន់ផ្ទុះ និងពន្ធអាករ៕
Bong I.T