ចិន៖ ចាប់តាំងពីមានការផ្ទុះឡើងនៃវីរុសកូរ៉ូណាក្នុងប្រទេសចិនកាន់តែខ្លាំងឡើងមក ក្រុមអ្នកវិទ្យាសាស្ត្រមកពីក្រុមហ៊ុនឱសថ និងស្ថាប័នផ្សេងៗបានប្រឹងប្រែងសិក្សាស្រាវជ្រាវយ៉ាងយកចិត្តទុកដាក់ ដើម្បីបង្កើតវ៉ាក់សាំងទប់ស្កាត់ការរីករាលដាលនៃវីរុសដ៏កាចសាហាវនេះ។ ហើយថ្មីៗនេះដែរ ក្រុមអ្នកស្រាវជ្រាវមកពីទីក្រុងសៀងហៃ បានផលិតគំរូវ៉ាក់សាំងថ្មីមួយ ដែលទើបតែបានធ្វើតេស្តនៅលើសត្វ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកវេជ្ជបណ្ឌិត Liu Zhongmin ប្រធានមន្ទីរពេទ្យសៀងហៃ ក្រោមសាកលវិទ្យាល័យវេជ្ជសាស្ត្រតុងជីបាននិយាយថា៖
ការធ្វើតេស្តវ៉ាក់សាំងនៅលើសត្វកណ្តុរគឺគ្រាន់តែជាកម្រិតបឋមប៉ុណ្ណោះ បន្ទាប់ពីការរកឃើញធាតុសំខាន់ដែលមានប្រសិទ្ធិភាពអាចប្រឆាំងនឹងវីរុសនេះបាន វ៉ាក់សាំងបន្ទាប់នឹងត្រូវបានគេបន្តធ្វើតេស្តនៅលើសត្វធំៗដូចជា សត្វស្វា។ ពេលនោះហើយ វានឹងអនុញ្ញាតឱ្យយើងអាចវាស់វែងពីកម្រិតសុវត្ថិភាព ក៏ដូចជាប្រសិទ្ធភាពរបស់វ៉ាក់សាំងនោះ។ លោកបានបន្តទៀតថា សត្វកណ្តុរជាងមួយរយក្បាល នឹងត្រូវការប្រើប្រាស់ជាចាំបាច់ក្នុងការធ្វើតេស្តនៅថ្ងៃអាទិត្យនេះ។
ការធ្វើតេស្តវ៉ាក់សាំងនៅលើសត្វគឺជាជំហានមួយចាំបាច់ មុនពេលឈានទៅដល់ការបង្កើតវ៉ាក់សាំងពិតប្រាកដ ដើម្បីឱ្យអ្នកវិទ្យាសាស្ត្រអាចធានាបាននូវប្រសិទ្ធភាពរបស់វា។ ហើយស្របពេលជាមួយគ្នានេះដែរ មជ្ឈមណ្ឌលគ្រប់គ្រងនិងបង្ការជំងឺនៅទីក្រុងប៉េកាំងរបស់ប្រទេសចិន ក៏បាននឹងកំពុងធ្វើតេស្តវ៉ាក់សាំងគំរូការពារពីវីរុសកូរ៉ូណារបស់ខ្លួនដែរ៕
Bong I.T