ចិន៖ យោងតាមទិន្នន័យរបស់គណៈកម្មាធិការសុខាភិបាលជាតិចិន ចំនួនអ្នកស្លាប់ដោយសារជំងឺរលាកសួតប្រភេទថ្មី (2019-nCoV) កើនលើស ៩០០ នាក់ហើយ ដោយគិតត្រឹមម៉ោង ៧ និង៣០ នាទី ព្រឹកថ្ងៃចន្ទ ទី១០ ខែកុម្ភៈ នេះ។ បន្ទាប់ពីការរាយការណ៍ពីខេត្តហ៊ូបុីថា មានអ្នកស្លាប់ចំនួន ៩១ នាក់បន្ថែម។ អ្នកស្លាប់ភាគច្រើនស្ថិតក្នុងប្រទេសចិន ជាពិសេសក្រុងវូហាន ជាតំបន់ដែលផ្ទុះជំងឺមុនគេ ក្រៅពីនេះ មានម្នាក់នៅហ្វីលីពីន និង១ម្នាក់ទៀតនៅហុងកុង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើយោងតាមទិន្នន័យ Tracking Coronavirus របស់ BNO News បានបង្ហាញថា អ្នកជំងឺកើនដល់ជាង ៤០,០០០នាក់ ដោយក្នុងនោះ ក្នុងខេត្តហ៊ូបុី មានជាង ២៥០០ករណីក្នុង១ថ្ងៃ។ ទន្ទឹមនឹងនេះដែរ អ្នកជំងឺជាង ៣២០០នាក់ បានជាសះស្បើយវិញក្រោយបានទទួលការព្យាបាល ចំណែកឯអ្នកជំងឺជាង ៦៤០០នាក់ទៀតស្ថិតក្នុងស្ថានភាពធ្ងន់ធ្ងរ។
សូមជម្រាបថា ក្រៅពីប្រទេសចិន ហុងកុង តៃវ៉ាន់ និងម៉ាកាវ គឺមានប្រទេសចំនួន ២៤ ផ្សេងទៀតដែលមានអ្នកឆ្លងវីរុសប្រភេទថ្មីនេះ រួមមាន ជប៉ុន សិង្ហបុរី ថៃ កូរ៉េខាងត្បូង អូស្ត្រាលី ម៉ាឡេស៊ី អាល្លឺម៉ង់ សហរដ្ឋអាមេរិក វៀតណាម កាណាដា បារាំង អេមីរ៉ាតអារ៉ាប់រួម ចក្រភពអង់គ្លេស ហ្វីលីពីន ឥណ្ឌា អុីតាលី រុស្ស៊ី ណេប៉ាល់ កម្ពុជា ស្រីលង្កា ហ្វាំងឡង់ ស៊ុយអែត អេស្ប៉ាញ និងបែលហ្ស៊ិក៕