ភ្នំពេញ៖ និយាយដល់ឈ្មោះ យ៉េន ឌីណា (ប៉ោ ភារឹទ្ធ) ប្រិយមិត្តដែលតែងតែនិយមតាមដាន និងអ្នកគាំទ្រនូវវិស័យកីឡាប្រដាល់គុនខ្មែរ ច្បាស់ជាស្គាល់ច្បាស់អ្នកប្រដាល់មានដើមកំណើតមកពីខេត្តកោះកុង រហស្សនាមសាច់សល្អកែងម្នាក់នេះ។ ក្រោយធ្លាក់ចុះទម្រង់នៃការវាយមួយរយៈមុន យ៉េន ឌីណា ត្រូវបានគេមើលឃើញថាបានឡើងយ៉ាងខ្លាំងក្រោយចូលរោងជ័យរួច។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាក់ស្ដែង ១៤ប្រកួតក្រោយរៀបអាពាហ៍ពិពាហ៍រួចកូនសិស្សរបស់លោកគ្រូ អេ ភូថង ម្នាក់នេះប្រកួតមិនដែលចាញ់នោះទេ មិនថាសង្វៀនក្នុងស្រុកនិងក្រៅស្រុក។ បើតាមការធ្លាប់បញ្ជាក់របស់សាម៉ីខ្លួនផ្ទាល់ចំពោះជោគជ័យនិងកត្តាសំខាន់ៗដែលធ្វើឲ្យគេប្រកួតឡើងដូចនេះគឺដោយសារតែមានការជម្រុញទឹកចិត្តខ្លាំងពីភរិយា។
យ៉ាងណាមិញ ជារឿងដ៏គួរឲ្យសោកសៅមួយក្រោយកាលពីយប់មិញ យ៉េន ឌីណា បានបង្ហោះនៅលើគណនី Facebook ផ្ទាល់ខ្លួនដែលភរិយារបស់លោកបានឈឺត្រូវសម្រាកនៅមន្ទីរពេទ្យ។
ប្រាប់មកកាន់ក្រុមការងាររបស់ Khmerload/Keylatop តាមរយៈសារអេឡិចត្រូនិក យ៉េន ឌីណា បានឲ្យដឹងថាមូលហេតុដែលភរិយារបស់លោកសម្រាប់នៅមន្ទីរពេទ្យគឺដោយសារតែទារកក្នុងផ្ទៃរបស់ភរិយារបស់លោកបានស្លាប់។ ឌីណា បានបន្តឲ្យដឹងថាលោកមិនបានដឹងអំពីបញ្ហានេះទេគឺរហូតតែដល់ពេលទៅពិនិត្យនៅមន្ទីរពេទ្យទើបគ្រូពេទ្យបានប្រាប់ថាទារកក្នុងផ្ទៃនោះបានស្លាប់ប្រមាណជា១ខែទៅហើយ ដោយគ្រូពេទ្យបានបញ្ជាក់ថាហេតុផលគឺដោយសារតែទារកក្នុងផ្ទៃមិនមានការលូតលាស់។ ម្ចាស់ខ្សែក្រវាត់ច្រើនខ្សែរូបនេះក៏បានឲ្យដឹងថាបើមកមន្ទីរពេទ្យមិនទាន់ពេលវេលាទេ នោះនឹងអាចប៉ះពាល់ទៅដល់ភរិយារបស់លោកថែមទៀត។
ជាមួយនឹងដំណឹងដ៏សោកស្ដាយមួយនេះ មានអ្នកគាំទ្រជាច្រើនបានសម្ដែងអារម្មណ៍សោកស្ដាយ និងជូនពរឲ្យភរិយារបស់ យ៉េន ឌីណា ឆាប់ជាសះស្បើយតាមរយៈការចូល Comment ផងដែរ៕