ចុម! បុរសម្នាក់ស្ដោះទឹកមាត់ជូតប៊ូតុងជណ្ដើរយន្ដ ចំពេលដែលគេគ្រប់គ្នាកំពុងខ្លាចឆ្លងវីរុសកូរ៉ូណា...(មានវីដេអូ)

ចិន៖ ចាប់តាំងពីការផ្ទុះវីរុសកូរ៉ូណាមក គេសង្គេតឃើញជណ្ដើរយន្ដជាច្រើន បានបំពាក់នូវកន្សែងដៃអនាម័យ ដើម្បីផ្ដល់ភាពងាយស្រួលដល់អ្នកដំណើរ ដោយមិនចាំបាច់ចុចលើប៊ូតុងដោយផ្ទាល់។ តែបើទោះបីជាមានការប្រុងប្រយ័ត្នយ៉ាងណាក្ដី ក៏មានមនុស្សអសីលធម៌មួយចំនួន បានធ្វើរឿងមិនគប្បីនៅទីសាធារណៈ ស្របពេលមនុស្សជាច្រើនកំពុងខ្លាចរអាជំងឺឆ្លងដ៏អាក្រក់មួយនេះ។

យោងតាមឃ្លិបវីដេអូ ដែលថតដោយកាមេរ៉ាសុវត្ថិភាព បានបង្ហាញពីទង្វើមិនគួរគប្បីរបស់ស្ត្រីម្នាក់ បានយកក្រដាសអនាម័យមកជូតច្រមុះ និងមាត់របស់នាង រួចហើយក៏ទម្លាក់ចោលយ៉ាងរាយប៉ាយនៅក្នុងជណ្ដើរយន្ដ។ តែអ្វីដែលកាន់អាក្រក់ជាងនេះទៀតនោះ ខណៈមានមនុស្សប្រហែលពីរបីកំពុងជិះក្នុងជណ្ដើរយន្ដរួមគ្នា ស្រាប់តែជនអគតិម្នាក់ បានរើសយកក្រដាសដែលគេបោះចោល រួចបើកម៉ាសដែលកំពុងពាក់ស្ដោះទឹកមាត់ដាក់ក្រដាសនោះតែម្ដង។ មិនត្រឹមតែប៉ុណ្ណោះ ជននេះថែមទាំងយកក្រដាសនោះទៅជូតលើប៊ូតុងជណ្ដើយន្ដចំនួនបីដងទៀតផង។

ជាលទ្ធផល ក្រោយវីដេអូខាងលើបានបង្ហោះចែកចាយពាសពេញប្រព័ន្ធអុីនធឺណេតរួចមក ប៉ូលិសក៏បានធ្វើការស៊ើបអង្កេត និងចាប់ជនបង្កឲ្យទៅផ្តន្ទាទោស ហើយត្រូវបានកាត់ទោសជាប់ពន្ធនាគារយៈពេល ១០ថ្ងៃ ពីបទបង្កភាពភិតភ័យនៅទីសាធារណៈ៕