ខេត្តកណ្តាល ៖ បុរសម្នាក់បានត្រូវកម្លាំងប៉ុស្តិ៍ឃុំពើក សហការជាមួយប៉ូលិសព្រហ្មទណ្ឌស្រុកអង្គស្នួល ដឹកនាំដោយលោកអធិការ មាន សំណាង ធ្វើការចាប់ខ្លួនតាមដីកា របស់សាលាដំបូងខេត្ត ដែលបានចោទប្រកាន់ពីបទប៉ុនប៉ងមនុស្សឃាតដោយចេតនា កាលពី៦ឆ្នាំមុន ។ ការចាប់ខ្លួននេះ បានធ្វើឡើងកាលពីវេលាម៉ោង១០និង៤៥នាទីព្រឹកថ្ងៃទី២៧ មីនា ឆ្នាំ២០១២ នៅមុខរោងចក្រកាត់ដេរ យីហោសាន់បេស ដែលមានទីតាំងស្ថិតនៅក្នុងភូមិអង្គស្នួលទី១ ឃុំពើក ស្រុកអង្គស្នួល ។
ជនជាប់ចោទរូបនេះឈ្មោះ ហេង បុត្រ អាយុ២៧ឆ្នាំ មានទីលំនៅភូមិអង្គស្នួលទី២ ឃុំពើក ត្រូវប៉ូលិសចាប់ខ្លួន តាមដីកាលេខ៦៨៤ ដ.ប.ច.ខ ចុះថ្ងៃទីខែកញ្ញា ឆ្នាំ២០១១ ពីបទប៉ុនប៉ងមនុស្សឃាតដោយចេតនា មានស្ថានទម្ងន់ទោសឧក្រិដ្ឋ ចេញដោយសាលាដំបូងខេត្តកណ្តាល ដែលបានប្រព្រឹត្តកាលពីថ្ងៃទី២៧ ខែធ្នូ ឆ្នាំ២០០៦ នៅក្នុងភូមិអង្គស្នួលទី៣ ឃុំពើក ស្រុកអង្គស្នួល ។
តាមប្រភពព័ត៌មានពីសមត្ថកិច្ចឱ្យដឹងថា កាលពី៦ឆ្នាំមុន ជនជាប់ចោទមានគ្នា២នាក់បានធ្វើសកម្មភាពកាប់ប្រហារ បុរសម្នាក់ក្នុងរឿងទំនាស់មួយ បណ្តាលឱ្យបុរសនោះរងរបួសយ៉ាងដំណំ រួចក៏គេចខ្លួនរហូតដល់ពេលនេះ ទើបត្រូវកម្លាំងប៉ូលិសអនុវត្តតាមដីកាចាប់ខ្លួនបាន ជាបន្តបន្ទាប់ ។ បក្សពួករបស់ជននេះ ដែលជាជនដៃដល់កាប់គូទំនាស់ ត្រូវបានគេស្គាល់ថាឈ្មោះ សាំ សុវណ្ណ ហៅ គក់ អាយុ២៣ឆ្នាំ បានចាប់ខ្លួនតាមដីកា កាលពីជាង១ឆ្នាំមុន ហើយត្រូវតុលាការកាត់ទោសឱ្យជាប់ពន្ធនាគាររយៈពេល១៦ឆ្នាំ ចំណែកឯជនសង្ស័យ ឈ្មោះ ហេង បុត្រ នេះគេមិនទាន់ដឹងថាត្រូវតុលាការសម្រេចបែបណានៅឡើយទេ ។
ក្រោយការចាប់ខ្លួន ស្ត្រីជាម្តាយរបស់ជននេះ ដែលមានមុខរបរជាអ្នកលក់នំ បានធ្វើដំណើរទៅកាន់អធិការដ្ឋានប៉ូលិសស្រុកអង្គស្នួល ហើយអះអាងថា ទាក់ទិននឹងរឿងនេះរូបគាត់ និងឪពុកម្តាយរបស់ជនជាប់ចោទ ឈ្មោះ សាំ សុវណ្ណ បានចំណាយលុយចូលគ្នាអស់ចំនួន១.៥០០ដុល្លារ ក្នុងការដោះស្រាយគ្នាជាមួយជនរងគ្រោះឈ្មោះ កូយ គក ភេទប្រុស អាយុ២៨ឆ្នាំ មានទីលំនៅភូមិចំការជោរ ឃុំពើក ។ ការដោះស្រាយគ្នានោះ គឺកាលពីទើបនឹងកើតរឿងថ្មីៗ នៅឯសាលាដំបូងខេត្តកណ្តាល ដោយកាលណោះកូនប្រុសរបស់គាត់ឈ្មោះ ហេង បុត្រ ត្រូវសមត្ថកិច្ចចាប់ខ្លួនបញ្ជូនទៅតុលាការ ហើយតុលាការដោះលែងឱ្យនៅក្រៅឃុំ ដោយយកលុយទៅបង់ឱ្យជនរងគ្រោះ ។
ស្ត្រីជាម្តាយរៀបរាប់ទៀតថា ពេលនោះពួកគាត់បានធ្វើតាមតុលាការ ហើយជនរងគ្រោះក៏បានបញ្ចប់រឿងរួចដកពាក្យបណ្តឹងហើយដែរ ប៉ុន្តែក្រោយមកស្រាប់តែតុលាការចេញដីកាកោះហៅឱ្យចូល ខ្លួនជាបន្តបន្ទាប់ ឯកូនរបស់គាត់ និងមិត្តភក្តិគេមិនព្រមចូលព្រោះសំអាងថា រៀងរ៉ាវចប់អស់ហើយ ។ រហូតជាង១ឆ្នាំមុន ស្រាប់តែមានដីកាបង្គាប់ឱ្យចាប់ខ្លួន ហើយឈ្មោះ សាំ សុវណ្ណ ត្រូវសមត្ថកិច្ចចាប់តាមដីកា រួចបញ្ជូនទៅកាត់ ទោស ដោយតុលាការកាត់ក្តីឱ្យជាប់ពន្ធនាគាររហូត ដល់១៦ឆ្នាំ ឯកូនរបស់គាត់ក៏ត្រូវចាប់ខ្លួនពេលនេះទៀត ៕
ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
