មូលនិធិរបស់មហាសេដ្ឋី Bill Gates សន្យាថា នឹងផ្ដល់ប្រាក់ចំនួន១០០លានដុល្លារអាមេរិក ដើម្បីឆ្លើយតបនឹងការរាលដាលវីរុសកូរ៉ូណាប្រភេទថ្មី

អាមេរិក៖ មូលនិធិ Bill & Melinda Gates បានសន្យាកាលពីថ្ងៃពុធ (ទី៥ ខែកុម្ភៈ) ក្នុងការផ្ដល់ថវិកាចំនួន១០០ដុល្លារអាមេរិក សម្រាប់ការឆ្លើយតបជាសកល ចំពោះការរាតត្បាតនៃវីរុសថ្មី ដែលបានសម្លាប់មនុស្សជាង៥០០នាក់។ មូលនិធិនេះនឹងត្រូវបានប្រើ ដើម្បីពង្រឹងការរកឃើញ ការដាក់ឲ្យនៅដាច់ពីគេ​ និងការខិតខំព្យាបាល រួមទាំងប្រជាជនដែលប្រឈមនឹងហានិភ័យ និងការបង្កើតវ៉ាក់សាំងនិងរោគវិនិច្ឆ័យ។

លោក Mark Suzman ដែលជានាយកប្រតិបតិ្តរបស់មូលនិធិ Gates បាននិយាយថា អង្គការពហុភាគី រដ្ឋាភិបាលជាតិនានា វិស័យឯកជន និងសប្បុរសជនត្រូវតែធ្វើការរួមគ្នា ដើម្បីបន្ថយល្បឿននៃការផ្ទុះឡើង ជួយការពារប្រទេសនានាដែលងាយរងគ្រោះថ្នាក់បំផុត និងពន្លឿនការអភិវឌ្ឍគ្រឿងឧបករណ៍ផ្សេងៗ សម្រាប់គ្រប់គ្រងការរីករាលដាលនៃជំងឺនេះ។

ចំនួនទឹកប្រាក់ទាំងនេះបានរាប់បញ្ចូលទាំង១០លានដុល្លារអាមេរិក ដែលបានសន្យាកាលពីចុងខែមករាផងដែរ។ មូលនិធិនេះក៏បាននិយាយថា ខ្លួននឹងដឹកនាំថវិកាចំនួន២០លានដុល្លារអាមេរិកដល់អង្គការជាច្រើន ដូចជាអង្គការសុខភាពពិភពលោក មជ្ឈមណ្ឌលត្រួតពិនិត្យនិងការពារជំងឺឆ្លងរបស់អាមេរិក គណៈកម្មការសុខភាពជាតិរបស់ចិន និងមជ្ឈមណ្ឌលគ្រប់គ្រងនិងបង្ការជំងឺរបស់ចិន។

ហើយចំណែកថវិកាចំនួន២០លានដុល្លារអាមេរិកផ្សេងទៀត នឹងត្រូវប្រើសម្រាប់ជួយដល់អាជ្ញាធរសុខាភិបាលសាធារណៈ នៅអនុតំបន់សាហារ៉ាអាហ្វ្រិកនិងអាស៊ីខាងត្បូង ដែលជាតំបន់រងផលប៉ះពាល់យ៉ាងខ្លាំង ពីការរីករាលដាលនៃជំងឺកាលពីពេលថ្មីៗនេះ ដូចជាការរីករាលដាលនៃជំងឺផ្ដាសាយថ្មី H1N1 នៅឆ្នាំ២០០៩។

មូលនិធិនេះក៏បានសន្យាថា នឹងផ្ដល់ប្រាក់រហូតដល់៦០លានដុល្លារផងដែរ ដើម្បីពន្លឿនរបកគំហើញ ការអភិវឌ្ឍនិងការធ្វើតេស្តនៃវ៉ាក់សាំង ការព្យាបាលនិងការធ្វើរោគវិនិច្ឆ័យចំពោះវីរុសនេះ៕