ខ្លាំងបាត់! Pogba ប្រាប់មិត្តរួមក្រុមថាចង់ចាកចេញពី Man UTD ស្របពេលដែលក្លិបយក្សពីរកំពុងអន្ទងយ៉ាងខ្លាំង

អង់គ្លេស៖ កីឡាករខ្សែបម្រើ Paul Pogba បានប្រាប់ទៅកាន់មិត្តរួមក្រុមរបស់គេនៅ Manchester United ថាគេមានបំណង់ចង់ចាកចេញពីក្លិបនៅទីផ្សារដោះដូរកីឡាកររដូវក្ដៅខាងមុខ នេះបើតាមសេចក្ដីរាយការណ៍។

ខ្សែបម្រើជម្រើសជាតិបារាំងមិនទាន់បានបង្ហាញខ្លួននៅលើវាលស្មៅនៅឡើយតាំងពីខែធ្នូឆ្នាំមុន ក្រោយចូលលេងនៅរដូវកាលនេះបាន ៦ប្រកួតនិងមានបញ្ហារបួសកជើង ដែលពេលនេះបានទទួលការវះកាត់រួចរាល់ហើយ ប៉ុន្តែនៅមិនទាន់សះស្បើយ ១០០% ដើម្បីចូលលេងបាននៅឡើយ។

បើយោងតាមសារព័ត៌មាន Manchester Evening មិត្តរួមក្រុមរបស់ Pogba ជឿថាម្ចាស់អាវលេខ៦របស់បិសាចក្រហមមិនអាចបន្តរួមរស់ជាមួយក្លិបបាននោះទេ ខណៈកីឡាកររបស់ Man UTD មួយចំនួនក៏ចង់ឲ្យរូបគេចាកចេញផងដែរ។

បើតាមសេចក្ដីរាយការណ៍ពីក្នុងប្រទេសអ៊ីតាលីកាលពីប៉ុន្មានថ្ងៃមុននេះ Juventus បានចាប់អារម្មណ៍ក្នុងការនាំយក Pogba ត្រឡប់ទៅលេងនៅទីក្រុង Turin វិញ ដោយក្លិបរហស្សនាមសេះបង្កង់ជឿថាការមកដល់របស់ Bruno Fernandes នឹងអ្វើឲ្យ Man UTD យល់ព្រមលក់ Pogba នៅទីផ្សាររដូវក្ដៅខាងមុខ។

ក្រៅពី Juventus ក្លិបយក្សអេស្ប៉ាញ Real Madrid ឯណេះវិញបានដាក់ការចង់បានមកលើ Pogba យូរណាស់មកហើយ ដោយអ្នកចាត់ការទូទៅលោក Zinedine  Zidane ចង់បានកីឡាកររួមជាតិម្នាក់នេះទៅទុកជំនួស Kroos និង Modric ដែលមានវ័យកាន់តែច្រើន។

គួរឲ្យដឹងផងដែរថា Pogba បានផ្លាស់ពី Juventus មកកាន់ទឹកដីអង់គ្លេសចូលរួមជាមួយក្លិបបិសាចក្រហម Manchester United កាលពីរដូវក្ដៅឆ្នាំ២០១៦ ក្នុងតម្លៃខ្លួន១១៦លានដុល្លារ ប៉ុន្តែមួយរយៈកាលចុងក្រោយនេះដំណឹងនៃការចាកចេញរបស់កីឡាករដែលជួយឲ្យបារាំងឈ្នះពាន FIFA World Cup 2018 ចាកចេញពីកីឡដ្ឋាន Old Trafford មានការលេចឡើងជាបន្តបន្ទាប់៕

ប្រភព៖ DailyMail