ភ័យមិនស្ទើរទេ! ខឹងឃាត់រថយន្ដមិនជាប់ ស្រាប់តែលោកប៉ូលិសក្លាហានលោតឡើងពីលើរថយន្ដ តែត្រូវម្ចាស់បើកទៅមុខជាង ២ គីឡូម៉ែត្រ...(មានវីដេអូ)

ឥណ្ឌា៖ យោងតាមប្រភពព័ត៌មានមួយបានឲ្យដឹងថា ខណៈពេលដែលមន្ត្រីប៉ូលិសម្នាក់ឈ្មោះ Sunli កំពុងឈរត្រួតពិនិត្យឯកសាររថយន្ដត្រង់ចំណុចមួយ ក្នុងតំបន់ Nangloi ទីក្រុង  New Delhi ស្រាប់តែមានរថយន្ដមួយបានមកដល់។ ខណៈនោះ ប៉ូលិសបានចង្អុលប្រាប់ទីតាំងឲ្យរថយន្ដឈប់ ដើម្បីធ្វើការត្រួតពិនិត្យ ប៉ុន្តែម្ចាស់រថយន្ដហាក់មិនស្ដាប់តាមប៉ូលិស ហើយបែជាមានបំណងចង់បើករត់គេចទៅវិញ។ ពេលឃើញដូចនេះ លោក Sunli មិនដឹងធ្វើយ៉ាងណាទើបអាចបញ្ឈប់រថយន្ដបាន ក៏ស្រាប់តែលោតឡើង លើផ្នែកខាងមុខនៃរថយន្ដតែម្ដង។

ទោះជាយ៉ាងណាក៏ដោយ ជម្រើសមួយនេះ​មិនសមប្រកបឡើយ។ ផ្ទុយទៅវិញ ម្ចាស់រថយន្ដបែជាខំប្រឹងបង្កើនល្បឿនរថយន្ដ ហើយបើក តទៅមុខជាង ២ គីឡូម៉ែត្រ ដែលបានបង្កឲ្យប៉ូលិសដែលជាប់នៅខាងមុខ មានការភិតភ័យជាខ្លាំង។ ទន្ទឹមនឹងនេះដែរ អ្នករួមដំណើរជាច្រើនបានកត់ត្រា នូវហេតុការណ៍មួយនេះ ព្រមទាំងបានថតវីដេអូទុកក្នុងទូរស័ព្ទដៃរបស់ពួកគេទៀតផង។ ភ្លាមៗនោះ បន្ទាប់ពីមានសំណូមពរជាច្រើនពីអ្នករួមដំណើរ អ្នកបើករថយន្ដ ក៏បានឈប់រថយន្ដដើម្បីឲ្យ លោក Sunli ចុះ ហើយបានបើករត់គេចខ្លួនបន្ត។

ក្រោយវីដេអូនៃហេតុការណ៍ខាងលើ បានបង្ហោះនៅលើបណ្ដាញសង្គម ក៏ស្រាប់តែមានអ្នកប្រើប្រាស់ភាគច្រើន បានបង្ហាញការខឹងសម្បារយ៉ាងខ្លាំង និងមានអ្នកខ្លះទៀតចង់រកយុត្តិធម៌លោក Sunli  ទៀតផង។

យ៉ាងណាមិញ ក្រោយឃ្លិបនេះបានរីករាលដាលខ្លាំងនៅលើបណ្ដាញសង្គម នាយកដ្ឋានប៉ូលិស ក៏នឹងកំពុងធ្វើការស៊ើបអង្កេតលើបញ្ហានេះផងដែរ៕

សូមទស្សនាវីដេអូខាងក្រោម៖