ចិន៖ ក្មេងប្រុសពិការម្នាក់ដែលមានឈ្មោះ យ៉ាន ឆឹង អាយុ ១៦ឆ្នាំ ត្រូវបានគេប្រទះឃើញដេកស្លាប់យ៉ាងអាណោចអាធ័មនៅឯផ្ទះតូចមួយក្នុងខេត្តហ៊ូប៉ីភាគកណ្តាលប្រទេសចិន បន្ទាប់ពីឪពុកនិងបងប្អូនរបស់គាត់ត្រូវបានគេរៀបចំឱ្យទៅរស់នៅដាច់ដោយឡែកពីគ្នា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យោងតាមប្រព័ន្ធផ្សព្វផ្សាយក្នុងស្រុករបស់ប្រទេសចិនបានឱ្យដឹងថា ឪពុករបស់ក្មេងជំទង់រូបនេះបានបង្ហោះសារមួយចំនួននៅលើបណ្តាញសង្គមចិន Weibo ដើម្បីសុំអំពាវនាវរកជំនួយព្រមទាំងបានពន្យល់ថា កូនប្រុសរបស់គាត់ត្រូវបានគេទុកចោល ហើយគ្មានអាហារឬទឹកហូបទេ។
នៅក្នុងសារនោះគាត់បានបញ្ជាក់ទៀតថា កូនរបស់គាត់មានជំងឺតាំងពីកំណើត ដូចជា ញ័រដៃជើង ខ្សោយសាច់ដុំ ពិបាកលេបអាហារ ភ្នែកមើលមិនឃើញ ចំណែកត្រចៀកក៏ស្ដាប់មិនឮដែរ។ សរុបមកមានន័យថា ក្មេងប្រុសដ៏កំសត់ម្នាក់នេះបានរស់នៅយ៉ាងលំបាកតែម្នាក់ឯងក្នុងផ្ទះតូចមួយ។
ក្រោយការស្លាប់របស់ក្មេងប្រុសពិការរូបនេះ មន្ត្រីពីរនាក់នៅក្នុងប្រទេសចិនត្រូវបានគេដកចេញពីមុខតំណែងភ្លាមៗ បន្ទាប់ពីពួកគេបានរៀបចំដាក់ឱ្យឪពុកកូនទាំងពីររស់នៅដាច់ដោយឡែកគ្នា ប៉ុន្តែបែរជាខ្វះការយកចិត្តដាក់លើក្មេងប្រុសពិការម្នាក់នេះទៅវិញ។ ក្រុមមន្ត្រីថ្នាក់លើរបស់ប្រទេសចិនបានប្រកាសថា នឹងបន្តស៊ើបអង្កេតទៀត ជុំវិញករណីនៃស្លាប់របស់ក្មេងប្រុសម្នាក់នេះ។
សូមបញ្ជាក់ផងដែរថា ជំងឺរលាកសួតដែលបង្កឡើងដោយវីរុសកូរ៉ូណា ចេះតែបន្តចម្លងពីមនុស្សម្នាក់ទៅម្នាក់ទៀតជារៀងរាល់ថ្ងៃនៅទូទាំងប្រទេសចិន និងប្រទេសផ្សេងៗទៀត។ បើគិតមកដល់ពេលនេះ វីរុសកូរ៉ូណាមានសម្លាប់មនុស្សប្រមាណ ៤២៦នាក់ ខណៈអ្នកឆ្លងបានកើនឡើងដល់ ២០៦២២នាក់ហើយ។ ស្របពេលជាមួយគ្នានេះដែរ អង្គការសុខភាពពិភពលោក (WHO) បានព្រមានថា ចំនួនករណីអ្នកឆ្លងរីរុសដ៏កាចសាហាវនេះ គឺទំនងអាចនឹងកើនឡើងបន្តទៀត៕
Bong I.T