ចំនួនអ្នកស្លាប់ដោយសារជំងឺកូរ៉ូណាវីរុសប្រភេទថ្មី បានកើនតួលេខឡើងដល់ ២១៣នាក់ក្នុងប្រទេសចិន បន្ទាប់ពីខេត្តHubei បានរាយការណ៍ថា ចំនួនអ្នកស្លាប់មាន ៤២នាក់បន្ថែមគិតត្រឹមព្រឹកថ្ងៃសុក្រទី៣១ មករានេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមន្ត្រីសុខាភិបាលខេត្តខាងលើបានប្រកាសថា អ្នកស្លាប់ព្រោះជំងឺរលាកសួតដែលបង្កឡើងដោយមេរោគកូរ៉ូណាវីរុសបានកើនឡើងជាបន្តបន្ទាប់ ដែលតួលេខនេះបានធ្វើឲ្យអ្នកស្លាប់សរុបក្នុងខេត្តដែលផ្ទុះជំងឺបានកើនឡើង២០៤នាក់ហើយ។
តាមការចុះផ្សាយរបស់ទូរទស្សន៍សិង្ហបុរី អាជ្ញាធរខេត្តបានប្រកាសរកឃើញករណីថ្មី ១២២០ករណីទៀត ដែលធ្វើឲ្យករណីឆ្លងសរុបមាន៥៨០៦។
ជាការកត់សម្គាល់ តួលេខអ្នកស្លាប់បន្ថែមនេះបានកើនឡើងប៉ុន្មានម៉ោងប៉ុណ្ណោះក្រោយអង្គការសុខភាពពិភពលោក (WHO) បានប្រកាសអាសន្នជាសកលអំពីវីរុសដ៏កាចសាហាវនេះ ព្រោះមិនត្រឹមតែមាននៅក្នុងប្រទេសកើតហេតុ ខាងលើទេ តែវាបានឆ្លងរាលដាលនៅប្រទេសជាច្រើនជុំវិញពិភពលោកផងដែរ។
នៅក្នុងវីដេអូខាងក្រោម លោក Tedros Adhanom Ghebreyesus ប្រធានអង្គការសុខភាពពិភពលោកបានបញ្ជាក់នៅក្នុងសន្និសីទសារព័ត៌មានមួយនៅទីក្រុងហ្សឺណែវថា៖«ការព្រួយបារម្ភដ៏ធំបំផុត គឺការរាលដាលនៃវីរុសនេះដល់បណ្តាប្រទេសដែលមានប្រព័ន្ធសុខភាពខ្សោយ»។ លោកបានបន្ថែមថា វីធីសាស្ត្រមានតែមួយគត់ដែលអាចបញ្ឈប់វាបាន គឺប្រទេសទាំងអស់ត្រូវរួបរួមគ្នា។
យ៉ាងណា ប្រធានអង្គការសុខភាពពិភពលោករូបនេះបានលើកឡើងថា ការរឹតត្បិតការធ្វើដំណើរ និងពាណិជ្ជកម្មផ្សេងៗជាមួយចិន គឺជារឿងមិនចាំបាច់ឡើយ។ លោកថាប្រទេសជាច្រើនបានផ្តល់អនុសាសន៍មិនឱ្យពលរដ្ឋរបស់គេ ទៅទស្សនាប្រទេសចិន ខណៈពេលដែលប្រទេសមួយចំនួនបានហាមឃាត់អ្នកដំណើរពីទីក្រុង Wuhan មិនឲ្យចូលក្នុងប្រទេសរបស់គេ៕