អុញ! មហាសេដ្ឋីជប៉ុនបែរជាលុបចោល គម្រោងជ្រើសរើសគូស្នេហ៍ នៅពាក់កណ្ដាលទី

ជប៉ុន៖ មហាសេដ្ឋីប្រាក់ប៊ីលានជនជាតិជប៉ុនម្នាក់ ដែលកំពុងប្រកាសស្វែងរកនារីដៃគូជីវិតម្នាក់ ដើម្បីរួមដំណើរជាមួយគាត់នៅលើយានអវកាសរបស់ SpaceX ដែលនឹងធ្វើការហោះហើរជុំវិញឋានព្រះចន្ទ បានលុបចោលផែនការរបស់គាត់ហើយ។ លោក យឹសាគឹ​ មេសាវ៉ា ដែលមានទ្រព្យសម្បត្តិស្ដុកស្ដម្ភខាងម៉ូដសំលៀកបំពាក់ បានអញ្ជើញនារីៗនៅលីវអាយុលើសពី២០ឆ្នាំ ដើម្បីដាក់ពាក្យចូលរួមកម្មវិធីជ្រើសរើសគូស្នេហ៍។ បេក្ខនារីជិត២៨,០០០នាក់បានដាក់ពាក្យចូលរួម ប៉ុន្តែនៅថ្ងៃព្រហស្បតិ៍ម្សិលមិញ គាត់បាននិយាយថា គាត់កំពុងតែមានអារម្មណ៍ច្របូកច្របល់ ហើយលែងចង់ប្រកាសស្វែងរកអ្វីទៀតឡើយ ពីព្រោះគាត់នៅតែចង់ធ្វើដំណើរទៅទីអវកាសក្នុងឆ្នាំ២០២៣​ ដោយមិនត្រូវការដៃគូ។

ក្នុងខែមករានេះ សេដ្ឋីអាយុ៤៤ឆ្នាំរូបនេះ បានផ្សព្វផ្សាយនៅលើប្រព័ន្ធអ៊ីនធឺណេត ដើម្បីស្វែងរកនារីម្នាក់ និងធ្វើដំណើររួមគ្នាទៅទីអវកាស។ នៅលើគេហទំព័ររបស់គាត់ បានបង្ហាញពីបញ្ជីលក្ខខ័ន្តិកៈរួមមាន៖ ពួកគេត្រូវនៅលីវ អាយុលើសពី២០ឆ្នាំ ហើយត្រូវមានចំណាប់អារម្មណ៍ក្នុងការធ្វើដំណើរទៅទីលំហ។ មានតែនារីម្នាក់ទេ ដែលត្រូវបានជ្រើសរើស នៅក្នុងកម្មវិធីមួយដែលមានឈ្មោះថា Full Moon Lovers។ លោក មេសាវ៉ា បាននិយាយនៅក្នុងបណ្ដាញសង្គម Twitter ថា គាត់នៅតែមានអារម្មណ៍ច្របូកច្របល់ នៅក្នុងការចូលរួម។ លោកបានបន្តទៀតថា ស្ត្រីចំនួន២៧,៧២២នាក់ដែលមានចិត្តស្មោះត្រង់និងក្លាហាន បានចំណាយពេលដ៏មានតម្លៃរបស់ពួកគេក្នុងការដាក់ពាក្យ។ ហើយវាបានធ្វើឲ្យគាត់មានអារម្មណ៍វិប្បដិសារីយ៉ាងខ្លាំង ទៅលើការកាត់សេចក្ដីនិងការប្រកាសប្រាប់អ្នករាល់គ្នាពីគំនិតអាត្មានិយមរបស់គាត់៕