អឺរ៉ុប៖ ក្រោយក្លិបនៅអ៊ីតាលី Inter Milan ប្រកាសជាផ្លូវការក្នុងការនាំចូលកីឡាករ Christian Eriksen ក្នុងតម្លៃខ្លួនប្រមាណ ២២លានដុល្លារ មានសំណួរជាច្រើនបានលើកឡើងថាហេតុអ្វីបានជា Real Madrid មិនព្យាយាមតាមទិញកីឡាករដែលនឹងផុតសុពលភាពកុងត្រាជាមួយ Tottenham Hotspur នៅខែមិថុនានេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែបម្រើជម្រើសជាតិដាណឺម៉ាក់ Eriksen មានព័ត៌មាននៃការចាប់អារម្មណ៍និងទំនាក់ទំនងក្នុងការផ្លាស់មកកាន់ Real Madrid តាំងតែពី២ឆ្នាំមុន ហើយរូបគេក៏ត្រូវបានមជ្ឈដ្ឋានជាច្រើនថាអាចនឹងពាក់អាវកីឡាកររបស់ Real Madrid ថែមទៀត។ អ្នកតំណាងផ្ទាល់របស់កីឡាករ និងភាគីអ្នកតំណាងរបស់ Real Madrid បានជួបពិភាក្សាគ្នាដល់ទៅពីរដង ហើយការព្រមព្រៀងមួយក៏ស្ទើរនឹងកើតមានឡើង។
អ្វីៗមិនអាចលេចចេញជារូបរាង បន្ទាប់ពីប្រធានក្លិប Spurs លោក Daniel Levy ហាក់មិនចង់ឲ្យ Eriksen ចាកចេញកាលពីរដូវក្ដៅឆ្នាំ២០១៨។ នៅពេលនោះប្រធានក្លិបរបស់ Spurs បានទាមទារនូវតម្លៃខ្លួនមួយខ្ពស់គឺប្រមាណជា ១១១លានដុល្លារ។ ជាការឆ្លើយតបនៅពេលនោះ ភាគីខាងកីឡដ្ឋាន Santiago Bernabeu បានដកខ្លួនមួយជំហានចំពោះតម្លៃខ្លួននេះដើម្បីរង់ចាំពេលវេលាសមស្របណាមួយ ដែលតម្លៃខ្លួនអាចនឹងមានការធ្លាក់ចុះ។
យ៉ាងណាមិញ នៅទីផ្សាររដូវរងាខែមករានេះ Inter Milan ក្រោមការដឹកនាំរបស់អ្នកចាត់ការទូទៅលោក Antonio Conte បាននាំយក Christian Eriksen ទៅលេងនៅទឹកដីប្រទេសអ៊ីតាលី អមជាមួយនឹងកិច្ចសន្យារហូតដល់ឆ្នាំ២០២៤។
គួរឲ្យដឹងដែរថា ក្រោយបោះបង់ការចង់បានមកលើ Eriksen អ្នកចាត់ការទូទៅសញ្ជាតិបារាំង Zinedine Zidane បានដាក់ការចាប់អារម្មណ៍មកលើខ្សែបម្រើចំនួន២រូបផ្សេងទៀតគឺ Paul Pogba របស់ Manchester United និង Donny Van de Beek របស់ Ajax៕
ប្រភព៖ Marca