ក្ដៅៗ! ទៅលីគកំពូលថៃមិនបានប៉ុន្មានផង ធារី ចន្ថាប៊ីន ត្រឡប់មកចូលរួមក្លិបមួយនៅម៉ាឡេស៊ីវិញ តែមិនមែន Terengganu ទេ

ម៉ាឡេស៊ី៖ ខ្សែបម្រើក្រុមជម្រើសជាតិគោព្រៃកម្ពុជា កីឡាករ ធារី ចន្ថាប៊ីន នៅមុននេះបន្តិចបានបង្ហោះនៅលើបណ្ដាញសង្គមផ្ទាល់ខ្លួនផ្លូវការ ក្នុងការទៅចូលរួមជាមួយក្លិប Perak FA ដែលកំពុងលេងនៅលីគកំពូលម៉ាឡេស៊ី Malaysia Super League។

ក្រោយចប់រដូវកាល២០១៩ កីឡាករកូនកាត់ ខ្មែរ-បារាំង រូបនេះបានចាកចេញពីក្លិប Terengganu ដែលលេងនៅលីគកំពូលម៉ាឡេស៊ី មកចូលរួមជាមួយក្លិបនៅលីគកំពូលថៃ Sukhothai FC សម្រាប់រដូវកាលថ្មី២០២០ កាលពីខែធ្នូកន្លងទៅ។  យ៉ាងណាមិញ មិនទាន់បានបង្ហាញខ្លួនជាផ្លូវការឲ្យ Sukhothai នៅឡើយ ស្រាប់តែ ធារី បានផ្លាស់មកកាន់ប្រទេសម៉ាឡេស៊ីវិញដោយចូលរួមជាមួយ Perak FA។

គួរឲ្យដឹងដែរថា ក្លិបបាល់ទាត់ Perak FA កាលពីរដូវកាល២០១៩កន្លងទៅ បានបញ្ចប់ទៅក្នុងចំណាត់ថ្នាក់លេខ៥ នៃក្របខណ្ឌលីគកំពូលម៉ាឡេស៊ី៕