ក្នុងស្ថានភាពបច្ចុប្បន្នដែលប្រជាពលរដ្ឋកំពុងមានការភ័យខ្លាចដោយសារកូរ៉ូណាវីរុសកំពុងមានវត្តមានក្នុងស្រុក មានការពន្យល់មួយចំនួនបែបបច្ចេកទេសវេជ្ជសាស្ត្របានបកស្រាយជូនមហាជន។ យ៉ាងណា ក៏មានការចែកចាយព័ត៌មានមួយចំនួនដែលអ្នកជំនាញអះអាងថា អ្នកផ្សាយមានបំណងមិនសុច្ចរិតក្នុងគោលបំណងចង់កេងចំណេញអ្វីម្យ៉ាងពីអ្នកតាមដាន។ ខណៈអ្នកទទួលព័ត៌មានពីបណ្តាញសង្គមខ្លះបានត្អូញត្អែរ ជាបន្តបន្ទាប់ថាខ្លួនវិលមុខដោយសារការផ្សាយជាហូរហែទាំងមានប្រភព និងគ្មានប្រភពរឿងកូរ៉ូណាវីរុសនៅកម្ពុជា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទាក់ទិននឹងបញ្ហាខាងលើ Khmerload បានជួបសំភាសន៍ជាមួយលោក ច័ន្ទ សុផល នាយកមជ្ឈមណ្ឌលគោលនយោបាយ ក្នុងន័យស្វែងយល់ពីបញ្ហាប្រឈមថា តើជនឆ្លៀតឱកាសអាចកេងប្រវ័ញ្ចរបៀបណាខ្លះ ពីការភ័យខ្លាចរបស់ប្រជាជន? ហើយថាតើមានដំណោះស្រាយណាខ្លះ ដែលពលរដ្ឋគួរយល់ដឹងដើម្បីកុំឲ្យគេកេងប្រវ័ញ្ចបាន?
Khmerload៖ តើជនឆ្លៀតឱកាសអាចកេងប្រវ័ញ្ចរបៀបណាខ្លះ ពីការភ័យខ្លាចរបស់ប្រជាជន?
លោកច័ន្ទ សុផល៖ ពួកគេអាចបង្កើតព័ត៌មានមិនពិតដោយប្រើប្រាស់អ្វីមួយ ដើម្បីកេងចំណេញក្នុងស្ថានភាពដែលគ្រប់គ្នាកំពុងមានភាពច្របូកច្របល់ដើម្បីចង់ចំណេញលុយកាក់ និងចំណាប់អារម្មណ៍។ ខណៈពលរដ្ឋកំពុងភ័យខ្លាច គេចង់ចំណេញលុយកាក់ពីការលក់ដូរ ឬការផ្សាយ។ ឧទាហរណ៍៖ ចំណេញអ្នក Like ឬShare ធ្វើឲ្យការផ្សាយពាណិជ្ជកម្មរបស់ខ្លួនកាន់តែល្បី ឬដើម្បីការលក់ដូរម៉ាស(គេតម្លើងតម្លៃតាមចិត្ត) ខ្ទឹមស និងថ្នាំពេទ្យលក់ដាច់ច្រើនជាដើម។
Khmerload៖ តើការភ័យស្លន់ស្លោររបស់ពលរដ្ឋ អាចបង្កជាបញ្ហាអ្វីខ្លះដែរ?
លោកច័ន្ទ សុផល៖ ពលរដ្ឋមួយចំនួនត្រចៀកស។ គាត់ឆាប់ភ័យខ្លាំង ហើយងាយនឹងចាញ់បោកគេ។ អ្នកទាំងនោះបារម្ភពេក ហើយសម្រាកនៅផ្ទះមិនចេញក្រៅ។ ពលរដ្ឋមិនចេញមកធ្វើការ ធ្វើឲ្យថមថយប្រាក់កម្រៃរបស់ខ្លួន។ អ៊ឹចឹងវាប៉ះពាល់ដល់សកម្មភាពសេដ្ឋកិច្ចរបស់ខ្លួនឯងផ្ទាល់ ប៉ះពាល់ដល់ជីវភាពអ្នកលក់ដូរមួយចំនួនព្រោះគ្មានអ្នកទិញ និងកន្លែងកម្សាន្តមានការថយចុះអ្នកទៅទស្សនា។
Khmerload៖ តើមានដំណោះស្រាយណាខ្លះ ដែលពលរដ្ឋគួរយល់ដឹងដើម្បីកុំឲ្យជនឆ្លៀតឱកាសអាចកេងប្រវ័ញ្ចបាន?
លោកច័ន្ទ សុផល៖ ខ្ញុំយល់ថាយើងមិនគួរភ័យស្លន់ស្លោរពេកទេ។ តែយើងគួរប្រុងប្រយ័ត្នខ្លួនវិញ ជំងឺបែបនេះច្រើនរាតត្បាតលើអ្នកសុខភាពខ្សោយ និងមនុស្សចាស់។ បើសុខភាពយើងរឹងមាំ វាប្រៀបបីដូចជាផ្តាសាយ ហើយក្រោយមកក៏បាត់ទៅវិញ។
ជាធម្មតាយើងត្រូវជឿលើស្ថាប័នព័ត៌មានល្បីៗរបស់បរទេស ឬសេចក្តីថ្លែងការណ៍ណាមួយពីរដ្ឋាភិបាលទើបអាចទុកចិត្តបាន។ កុំជឿលើព័ត៌មានដែលគ្មានប្រភពច្បាស់លាស់ ធ្វើដើម្បីផ្សាយពាណិជ្ចកម្មរកលុយ ឆ្លៀតដើម្បីចំណេញ។ យើងត្រូវប្រយ័ត្នឱ្យមែនទែននាឱកាសជ្រួលច្របល់ ជឿតែប្រភពព័ត៌មានច្បាស់លាស់បានហើយ។
គួរបញ្ជាក់ថា ក្រសួងសុខាភិបាលកាលពីថ្ងៃ ២៧ ខែ មករា បានអំពាវនាវឲ្យអ្នកលក់ម៉ាស់ (mask) ទាំងអស់នៅកម្ពុជា ឲ្យចូលរួមទប់ស្កាត់ការចម្លងវីរុសកូរ៉ូណាថ្មី (2019-nCoV) ដោយកុំតម្លើងថ្លៃម៉ាស់ ដើម្បីទុកលទ្ធភាពឲ្យពលរដ្ឋដែលមានតម្រូវការប្រើម៉ាស់ អាចទិញប្រើបាន ជាកិច្ចចូលរួមការពារសុខភាពផ្ទាល់ខ្លួនលើការចម្លងជំងឺនេះ និងជាបុណ្យកុសលសម្រាប់អ្នកលក់ម៉ាស់ផងដែរ៕