អូស្ត្រាលី៖ សាលារៀនមួយចំនួននៅប្រទេសអូស្ត្រាលីនឹងចាត់វិធានការយ៉ាងតឹងរឹង ដោយបែងចែកសិស្សនិងនិស្សិតចិនឱ្យនៅដាច់ដោយឡែកពីមិត្តរួមថ្នាក់របស់ពួកគេ ក្នុងគោលបំណងដើម្បីទប់ស្កាត់ការរីករាលដាលនៃវីរុសកូរ៉ូណា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមគេហទំព័រសារព័ត៌មាន The Australian បានរាយការណ៍ថា សិស្សនិស្សិតទាំងអស់ក៏នឹងត្រូវឆ្លងកាត់ការត្រួតពិនិត្យសុខភាពប្រចាំថ្ងៃផងដែរ។ ក្នុងនោះសាលារៀនល្បីៗមួយចំនួននៅទីក្រុងស៊ីដនីក៏បានដាក់ចេញនូវវិធានការណ៍ថ្មីៗ ដោយសង្ឃឹមថានឹងអាចទប់ទល់ការរីករាលដាលនៃវីរុសកូរ៉ូណានេះ ខណៈករណីនៃអ្នកដែលឆ្លងវីរុសកូរ៉ូណា៣នាក់ហើយត្រូវបានគេរកឃើញនៅរដ្ឋញូសៅវែលក្នុងប្រទេសអូស្ត្រាលី។
មហាវិទ្យាល័យញូលីងតុនដែលស្ថិតនៅក្នុងទីក្រុងស៊ីដនី មហាវិទ្យាល័យស្កុតឡេនសំរាប់និស្សិតប្រុស និងសាលាខេមបាឡាសំរាប់និស្សិតស្រី បានប្រាប់ដល់ឪពុកម្តាយអាណាព្យាបាលសិស្សថា អ្នកដែលបានធ្វើដំណើរទៅប្រទេសចិន សាលានឹងតម្រូវឱ្យមានប័ណ្ឌបញ្ជាក់សុខភាពពីវេជ្ជបណ្ឌិតជាប្រចាំទើបអាចចូលសាលាបាន។
សូមបញ្ជាក់ផងដែរថា គ្រប់សាលារៀននិងសាកលវិទ្យាភាគច្រើននៅប្រទេសអូស្ត្រាលី បានចាប់ផ្តើមចេញវិធានការណ៍តឹងរឹងបែបនេះ ស្របពេលដែលវីរុសកូរ៉ូណាបាននិងកំពុងរីករាលដាលនៅទូទាំងពិភពលោក ដោយក្នុងនោះមានមនុស្សយ៉ាងហោច ១០៦នាក់បានស្លាប់ ខណៈអ្នកដែលឆ្លងវីរុសនេះបានកើនឡើងដល់ ៤០០០ នាក់ហើយ៕