ថ្មីនេះៗមានផ្ទុះករណីជំងឺរលាកសួត ដែលបណ្តាលមកពីវីរុសកូរ៉ូណាប្រភេទថ្មី នៅក្រុងវូហាន ខេត្តហ៊ុយបេ ប្រទេសចិន។ ទោះបីជាប្រទេសកម្ពុជាមិនទាន់ករណីជំងឺនេះនៅឡើយ ប៉ុន្តែក្រសួងសុខាភិបាលបានចេញ ប្រកាសឲ្យពលរដ្ឋខ្មែរ ពិសេសអ្នកដំណើរដែលមានគម្រោងធ្វើដំណើរទៅ ឬត្រលប់មកពីទីក្រុង វូហាន ខេត្តហ៊ុយបេ ប្រទេសចិន ត្រូវប្រយ័ត្នចំពោះករណីជំងឺរលាកសួត ដែលបណ្តាលមកពីវីរុសកូរ៉ូណាប្រភេទថ្មី និងបានដាក់ម៉ាស៊ីនស្កេនកម្តៅនៅអាកាសយានដ្ឋានអន្តរជាតិភ្នំពេញ ក្រុងព្រះសីហនុ និងសៀមរាប។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតើវីរុសកូរ៉ូណាជាអ្វី? ឆ្លងដោយរបៀបណាខ្លះ? ខាងក្រោមនេះជាការបកស្រាយលម្អិតអំពី វីរុសកូរ៉ូណា រៀបរៀងដោយនាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល។
១. វីវុសកូរ៉ូណាជាអ្វី?
វីរុសកូរ៉ូណា គឺជាក្រុមគ្រួសារវីរុសដ៏ធំមួយដែលបណ្តាលឲ្យមានជំងឺផ្តាសាយធម្មតា រហូតដល់ជំងឺធ្ងន់ធ្ងរជាច្រើនទៀត ដូចជា ជំងឺផ្លូវដង្ហើមមជ្ឈឹមបូព៌ា (MERS) និងសាសន៍ (SARS)។ ចំណែកឯវីរុសកូរ៉ូណាថ្មី គឺជាវីរុសថ្មីមួយដែលពីមុនមិនមាននៅលើមនុស្សឡើយ។
២. រោគសញ្ញាការឆ្លងវីវុសកូរ៉ូណា
- គ្រុនក្តៅ
- ក្អក
- ដង្ហើមខ្លី
- ពិបាកដកដង្ហើម
បើធ្ងន់ធ្ងរបណ្តាលឲ្យមានជំងឺរលាកសួត ជំងឺ SARS ជំងឺខ្សោយតម្រងនោម និងឈានដល់ស្លាប់។
៣. វីរុសកូរ៉ូណាឆ្លងដោយរបៀបណា?
វីរុស SARS ដែលជាសមាជិកក្រុមគ្រួសារវីរុសកូរ៉ូណា ឆ្លងពីសត្វសំពោចមកមនុស្សនៅប្រទេសចិន ក្នុងឆ្នាំ ២០០២។ វីរុស MERS ឆ្លងពីសត្វអូដ្ឋមកមនុស្ស នៅប្រទេសអារ៉ាប់ប៊ីសាអូឌីត ក្នុងឆ្នាំ ២០១២។ ចំណែកឯវីរុសកូរ៉ូណាមួយចំនួន ត្រូវបានគេដឹងថា មានចរាចរលើសត្វ ប៉ុន្តែមិនទាន់ឆ្លងមកមនុស្សនៅឡើយ ហើយដោយសារតែមានភាពប្រសើរឡើងនៃប្រព័ន្ធតាមដាននៅលើពិភពលោក វីរុសកូរ៉ូណាមួយចំនួនធំត្រូវគេកំណត់អត្តសញ្ញាណបាន។វីរុសកូរ៉ូណាប្រភេទខ្លះអាចចម្លងពីមនុស្សម្នាក់ទៅមនុស្សម្នាក់ទៀត តាមរយៈការប៉ះពាល់ ជិតស្និទ្ធជាមួយអ្នកជំងឺ ដូចជានៅកន្លែងធ្វើការ ក្នុងក្រុមគ្រួសារ មន្ទីរពេទ្យ ឬមណ្ឌលថែទាំសុខភាព។
៤. ធ្វើម៉េចដើម្បីបង្ការកុំឲ្យឆ្លងវីរុសកូរ៉ូណា?
មកដល់ពេលនេះមិនទាន់មានវ៉ាក់សាំងប្រឆាំងនឹងវីរុសកូរ៉ូណាថ្មីឡើយ ដោយសារតែជំងឺនេះជាជំងឺថ្មី អាចនឹងត្រូវចំណាយពេលច្រើនឆ្នាំ ដើម្បីបង្កើតវ៉ាក់សាំងថ្មីនេះ។ ទោះយ៉ាងណាយើងអាចបង្ការខ្លួន ដើម្បីកាត់បន្ថយការប្រឈម និងការចម្លងជំងឺ ដោយធ្វើតាមការណែនាំខាងក្រោម។
– ត្រូវរក្សាអនាម័យដៃ និងផ្លូវដង្ហើម
– ញ៉ាំចំណីអាហារត្រូវប្រុងប្រយ័ត្ន
– ចៀសវាងការរប៉ះពាល់ជិតស្និទ្ធជាមួយអ្នកជំងឺផ្លូវដង្ហើម (ក្អក និងកណ្តាស់)។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet