អាមេរិក៖ ទីភ្នាក់ងារអវកាសណាសាកំពុងត្រូវការបុគ្គលិក ដើម្បីបំពេញតួនាទីគួរឲ្យចាប់អារម្មណ៍មួយ នោះគឺការដឹកនាំបេសកកម្ម ដើម្បីនាំយកដុំថ្មដំបូងពីភពអង្គារ ត្រឡប់មកភពផែនដី។ អ្នកបំពេញមុខតំណែងនេះត្រូវដឹកនាំកម្មវិធីមួយដែលមានឈ្មោះថា Mars Sample Return (MSR) ដែលផ្ដោតសំខាន់ទៅលើការនាំយកសំណាកដូចជាដុំថ្មនិងដីពីភពអង្គារ ដើម្បីឲ្យក្រុមអ្នកវិទ្យាសាស្ត្រធ្វើការសិក្សាដោយផ្ទាល់។ ជំហានដំបូងនៃកម្មវិធីមួយនេះ គឺការបញ្ជូនយានធ្វើដំណើរលើភពអង្គារ Mars 2020 ដែលនឹងចាប់ផ្ដើមនៅថ្ងៃទី១៧ ខែកក្កដា ខាងមុខនេះ។ នៅពេលយាននេះចុះចតលើភពអង្គារ វានឹងធ្វើការប្រមូលសំណាកទុកក្នុងប្រអប់បិទជិតមួយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប៉ុន្តែការបញ្ជូនសំណាកទាំងនេះមកកាន់ផែនដីវិញ នៅតែចោទជាបញ្ហា ព្រោះបេសកកម្មបន្ទាប់នៅមិនទាន់រៀបចំ នៅឡើយទេ។ ដូច្នេះហើយ ទីភ្នាក់ងារអវកាសណាសាកំពុងជ្រើសប្រធានដឹកនាំបេសកកម្មសម្រាប់គម្រោងមួយនេះ។ ចំពោះប្រាក់កម្រៃវិញអាចទទួលបានចាប់ពី១៨២,៤២៤ដុល្លារ រហូតដល់១៨៨,០៦៦ដុល្លារក្នុងមួយឆ្នាំ។ ក្រុមអ្នកវិទ្យាសាស្ត្រពិតជាមានការអន្ទះសារយ៉ាងខ្លាំង ក្នុងការសិក្សាដីនៅលើភពអង្គារ នៅក្នុងមន្ទីរពិសោធន៍របស់ខ្លួន អស់រយៈពេលច្រើនឆ្នាំមកហើយ។
មកដល់ពេលនេះ ក្រុមអ្នកវិទ្យាសាស្ត្របានត្រឹមសិក្សាបំណែកអាចម៍ផ្កាយនៃភពអង្គារ ដែលធ្លាក់ចូលមកផែនដីតែប៉ុណ្ណោះ។ ចំពោះការពិសោធន៍ផ្សេងទៀត ធ្លាប់ត្រូវបានធ្វើឡើងដោយយានធ្វើដំណើរភពអង្គារដទៃទៀតដូចជា Curiosity ដែលបានប្រមូលសំណាកនៅលើផ្ទៃភពអង្គារ និងបានធ្វើការពិសោធន៍ដោយខ្លួនឯង ពីព្រោះនៅលើយាននេះមានបំពាក់ឧបករណ៍ពិសោធន៍មកស្រាប់ រួចហើយផ្ញើទិន្នន័យត្រឡប់មកផែនដីវិញ។ យានធ្វើដំណើរលើភពអង្គារ Mars 2020 គឺកំពុងត្រូវបានគេធ្វើតេស្ត សម្រាប់ការបាញ់បង្ហោះក្នុងពេលខាងមុខនេះ។ គេរំពឹងទុកថា វានឹងចុះចតនៅលើភពអង្គារនៅខែកុម្ភៈ ឆ្នាំ២០២១។ ចំពោះព័ត៌មានលម្អិត ស្ដីពីពាក្យជ្រើសរើសប្រធានផ្នែកគ្រប់គ្រងគម្រោងកម្មវិធី MSR អាចចូលមើលបាន នៅទីនេះ៕