អាមេរិក៖ មនុស្សដំបូងគេនៅសហរដ្ឋអាមេរិកដែលត្រូវបានគេធ្វើរោគវិនិច្ឆ័យថា មានផ្ទុកវីរុសកូរ៉ូណាវូហាន កំពុងត្រូវបានព្យាបាលដោយបុគ្គលិកពេទ្យនិងមនុស្សយន្តមួយ។ វេជ្ជបណ្ឌិត George Diaz ប្រធានផ្នែកជំងឺឆ្លងនៅមជ្ឈមណ្ឌលវេជ្ជសាស្ត្រ Providence Regional Medical Center ក្នុងទីក្រុង Everett នៃរដ្ឋវ៉ាស៊ីនតោនបាននិយាយថា មនុស្សយន្តនេះដែលបានបំពាក់ដោយឧបករណ៍សោតាទស្សន៍ គឺកំពុងជួយគ្រូពេទ្យក្នុងការជួយសង្គ្រោះអាយុជីវិតបុរសម្នាក់នោះ ដោយធ្វើការទំនាក់ទំនងជាមួយគាត់ តាមរយៈអេក្រង់ដ៏ធំមួយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបុរសនោះមានអាយុជាង៣០ឆ្នាំ ហើយត្រូវបានគេធ្វើរោគវិនិច្ឆ័យថាមានវីរុសនេះ កាលពីថ្ងៃចន្ទ។ ដំបូងឡើយ គាត់បានទៅគ្លីនិកថែទាំបន្ទាន់មួយ នៅថ្ងៃទី១៩ ខែមករា ហើយបានប្រាប់បុគ្គលិកនៅទីនោះថា គាត់មានការព្រួយបារម្ភអំពីរោគសញ្ញា ដែលអាចកើតមានមេរោគឆ្លងប្រភេទថ្មីនេះ ព្រោះកាលពីពេលថ្មីៗនេះ គាត់បានធ្វើដំណើរទៅកាន់ទីក្រុងវូហានប្រទេសចិន។ ចំណែកខាងមជ្ឈមណ្ឌលគ្រប់គ្រងនិងបង្ការជំងឺឆ្លងបាននិយាយថា បុរសម្នាក់នោះបានមកដល់អាកាសយានដ្ឋានអន្តជាតិ Seattle-Tacoma កាលពីថ្ងៃទី១៥ ខែមករា គឺមុនពេលការត្រួតពិនិត្យសុខភាព នៅតាមព្រលានយន្តហោះអាមេរិកចាប់ផ្ដើម។
បុរសដែលមកពីតំបន់ Snohomish គឺមានស្ថានភាពរឹងមាំ កាលពីថ្ងៃព្រហស្បតិ៍ ហើយត្រូវបានសម្រាកព្យាបាលដាច់ពីគេ នេះបើតាមការបញ្ជាក់របស់លោកវេជ្ជបណ្ឌិត Diaz។ ហើយគាត់បានបន្ថែមទៀតថា អ្នកជំងឺត្រូវបានសម្រាកព្យាបាលនៅលើគ្រែពិសេសមួយហៅថា ISOPOD ដែលស្ថិតនៅដាច់ដោយឡែកពីបន្ទប់ផ្សេងៗទៀត។
បុគ្គលិកថែទាំនៅក្នុងបន្ទប់បានផ្លាស់មនុស្សយន្តនៅជុំវិញ ដូច្នេះហើយគេអាចតាមដានអ្នកជំងឺ តាមរយៈអេក្រង់ដ៏ធំនោះ។ បន្ថែមពីនេះ ការធ្វើដូច្នេះ បានជួយកាត់បន្ថយការប៉ះពាល់អ្នកជំងឺដោយផ្ទាល់ផងដែរ។ គេមិនច្បាស់ថា តើពេលណាទើបអ្នកជំងឺអាចចាកចេញពីមន្ទីរពេទ្យបាននោះទេ ព្រោះខាងមជ្ឈមណ្ឌលពិនិត្យជំងឺ (CDC) ចង់ធ្វើតេស្តនិងសិក្សាឲ្យកាន់តែស៊ីជម្រៅបន្ថែមទៀត៕