ក្ដៅៗ! លោក Mauricio Pochettino កំពុងជួបពិភាក្សាជាមួយក្លិបយក្សមួយនៅ Premier League

អង់គ្លេស៖ លោក Mauricio Pochettino ត្រូវបានគេរាយការណ៍មកថាអាចនឹងក្លាយជាអ្នកចាត់ការទូទៅថ្មីរបស់ក្លិបបិសាចក្រហម Manchester United នៅពេលបញ្ចប់រដូវកាល ២០១៩-២០២០។ 

តំណែងអ្នកចាត់ការទូទៅបច្ចុប្បន្នរបស់លោក Ole Gunnar Solskjaer កំពុងតែស្ថិតនៅក្នុងភាពក្ដៅគគុក ក្រោយដឹកនាំក្រុមមិនទទួលបានលទ្ធផលគាប់ប្រសើរ។ ជាក់ស្ដែងកាលពីយប់មិញ Man UTD បានរងបរាជ័យនៅដីខ្លួនឯងក្នុងលទ្ធផល 0-២ យ៉ាងអាម៉ាសក្រោមថ្វីជើងក្រុម Burnley។ 

បើតាមអ្នកកាសែតកីឡាអ៊ីតាលីលោក Alfredo Peulla បានឲ្យដឹងថាក្លិបជើងឯកអង់គ្លេស ២០សម័យកាលកំពុងតែជួបពិភាក្សាជាមួយលោក Pochettino ដើម្បីនាំយកបុរសសញ្ជាតិអាហ្សង់ទីនរូបនេះមកជំនួសកន្លែងរបស់លោក Ole Gunnar Solskjaer នៅពេលបិទបញ្ចប់រដូវកាលនេះ។ 

ប្រភពដដែលបានបន្តឲ្យដឹងទៀតថា ក្រោយត្រូវបណ្ដេញចេញពីតំណែងកាលពីខែវិច្ឆិកា ឆ្នាំ២០១៩ អតីតអ្នកចាត់ការទូទៅរបស់ Spurs លោក Pochettino ក៏បានត្រៀមខ្លួនរួចរាល់ក្នុងការទទួលការងារថ្មីនៅរដូវក្ដៅខាងមុខ។ 

គួរឲ្យដឹងដែរថា អ្នកចាត់ការទូទៅដែលជួយឲ្យ Spurs ឡើងដល់វគ្គផ្ដាច់ព្រ័ត្រពានរង្វាន់ UEFA Champions League រដូវកាលមុន ក៏មានព័ត៌មានថាអាចនឹងទៅដឹកនាំ Barcelona មុនពេលតែងតាំងលោក Quique Setien ផងដែរ៕

ប្រភព៖ SportsMole