ក្រុមហ៊ុនបច្ចេកវិទ្យាជប៉ុនមួយ ចាប់ផ្តើមធ្វើការហោះហើរសាកល្បង នូវរថយន្តហោះ​តូច​​បំផុតលើលោក (មានវីដេអូ) ​

ជប៉ុន៖ ក្រុមហ៊ុនបច្ចេកវិទ្យាជប៉ុនមួយដែលមានឈ្មោះថា SkyDrive Inc ទើបតែបានធ្វើការហោះហើរសាកល្បងនូវរថយន្តហោះគំរូរបស់ខ្លួនដោយ​ក្នុងនោះមានអ្នកបើកបរម្នាក់​ ហើយក្រុមហ៊ុនគ្រោងនឹងធ្វើការបង្ហាញជាសាធារណៈនូវ​យន្តហោះមួយប្រភេទនេះនារដូវក្តៅខាងមុខ​។ ការហោះហើរសាកល្បងត្រូវបានធ្វើឡើងនៅក្នុងមជ្ឈមណ្ឌលស្រាវជ្រាវ
ការហោះហើររបស់ក្រុមហ៊ុន ដែលមានទីតាំងនៅខាងក្រៅទីក្រុងណាហ្គូយ៉ា។

​គួរបញ្ជាក់ផងដែរថា ក្រុមហ៊ុនបច្ចេកវិទ្យាមួយនេះធ្លាប់បានធ្វើការហោះហើរសាកល្បងនូវរថយន្តហោះមួយនេះ ជាច្រើន​លើកមកហើយ​កាលពីពេលកន្លងទៅ ​ប៉ុន្តែ​រាល់ការហោះហើរសាកល្បងទាំងនោះ ត្រូវបានធ្វើឡើងតាមរយៈការបញ្ជាពីចំងាយ។ យោងតាមរបាយការណ៍មួយ ដែលចេញផ្សាយដោយសារព័ត៌មាន The Asahi Shimbun បានឱ្យដឹងថា ក្រុមហ៊ុន SkyDrive Inc ​គ្រោងនឹងដាក់ដំណើរការរថយន្ត​ហោះរបស់ខ្លួននៅដើមឆ្នាំ ២០២៣។

រថយន្តហោះមួយប្រភេទនេះ នឹងមានបណ្តោយ ​២.៩ ម៉ែត្រ និងទទឹង ​១.៣ ម៉ែត្រ​ ចំណែកកំពស់របស់វាគឺ ​១.១ ម៉ែត្រ​ ​ហើយក្រុមហ៊ុនផលិតបានអះអាងថា វា​នឹងក្លាយទៅជារថយន្តហោះដែលមានទំហំតូចបំផុត​លើពិភពលោក។ ​វាអាចហោះហើរបានក្នុងល្បឿន ១០០គីឡូម៉ែត្រ​ក្នុងមួយម៉ោង ​ហើយ​នឹងអាចបើក​លើដីបានក្នុងល្បឿន ​១៥០ គីឡូ
ម៉ែត្រក្នុងមួយម៉ោង​។ 

​ក្រុមហ៊ុនបច្ចេកវិទ្យា SkyDrive Inc សង្ឃឹមផងដែរថា ​រថយន្តហោះ​របស់ខ្លួន នឹងអាចជួយសម្រួលដល់ការកកស្ទះចរាចរណ៍នៅក្នុងទីក្រុង​ ហើយក៏នឹងអាចចូលរួមក្នុងបេសកកម្មស្រាវជ្រាវនិងជួយសង្គ្រោះក្នុងគ្រាមានអាសន្នផងដែរ​៕

សូមទស្សនាវីដេអូខាងក្រោម៖