ល្អអីល្អយ៉ាងនេះមានក្បាច់បកចេកទៀត! ខ្សែការពារ Florian Lejeune ចំណាយពេលត្រឹម២នាទីចុងម៉ោង ស៊ុតបាន២គ្រាប់ជួយ Newcastle វាយបកតាមស្មើ Everton (មានវីដេអូ)

អង់គ្លេស៖ ក្រុមស្ករគ្រាប់ Everton និងក្រុមសារិកាព្រៃ Newcastle United បានត្រឹមចែកគ្នាម្នាក់១ពិន្ទុក្នុងការប្រកួតក្របខណ្ឌ Premier League សប្ដាហ៍ទី២៤នេះ ក្រោយក្រុមទាំងពីរប្រកួតស្មើគ្នា២ទល់នឹង២ នៅកីឡដ្ឋាន Goodison Park កាលពីរាត្រីថ្ងៃអង្គារម្សិលមិញ។

ក្នុងកាប្រកួតដ៏ជក់ចិត្តនេះ ក្រុមម្ចាស់ផ្ទះ Everton ជាអ្នកស៊ុតបើកឆាកនាំមុខមុន២គ្រាប់ ដោយគ្រាប់ទី១រកបានដោយខ្សែប្រយុទ្ធសញ្ជាតិអ៊ីតាលី Moise Keane នៅនាទីទី៣០ និងគ្រាប់ទី២ ស៊ុតបញ្ចូលទីដោយខ្សែប្រយុទ្ធវ័យ២២ឆ្នាំ Calvert-Lewin នៅនាទី៥៤។

ការប្រកួតអូសបន្លាយរហូតដល់ជិតបញ្ចប់តង់ទី២ នៅនាទី៩០+៤ ទើបក្រុមភ្ញៀវ Newcastle មានឱកាសវាយបកបាន១គ្រាប់ ដែលជាការស៊ុតបកចេកបានយ៉ាងល្អពីសំណាក់ខ្សែការពារកណ្ដាល Florian Lejeune។ មិនបាន២នាទីស្រួលបួលផង Lejeune ដដែលក៏បន្ថែម១គ្រាប់ទៀតតាមស្មើ ២-២ ​នៅនាទីទី៩០+៦។

ដូច្នេះក្រោយបញ្ចប់៩០នាទីក្រុម លោក Ancelotti បានត្រឹមខកចិត្តក្រោយមានឱកាសនាំមុខមុន២គ្រាប់ទៅហើយ បែជាត្រូវបានក្រុមភ្ញៀវ ស៊ុតវាយបកតាមស្មើចុងម៉ោងទៅវិញ។

តាមរយៈលទ្ធផលនេះ ក្រុម Everton ធ្លាក់មកកាន់ចំណាត់ថ្នាក់លេខ១២ ក្នុងតារាង Premier League ក្រោយ២៤កន្លងទៅ​ រកបាន៣០ពិន្ទុ ចំណែក​ឯក្រុម Newcastle United ឈរចំណាត់ថ្នាក់លេខ១៣ មាន៣០ពិន្ទុដូចគ្នា៕

បើចង់ឃើញការស៊ុតបញ្ចូលទីរបស់ Lejeune អស្ចារ្យយ៉ាងណាសោះ សូមទស្សនាវីដេអូខាងក្រោម៖