រកឃើញយូរហើយ! ប៉ុន្តែអ្នកវិទ្យាសាស្ត្រទើបតែអាចកំណត់អត្តសញ្ញាណរណ្ដៅអាចម៍ផ្កាយ ដែលមានអាយុកាលចាស់ជាងគេលើលោក

អូស្ត្រាលី៖ ក្រុមអ្នកវិទ្យាសាស្ត្រទើបតែអាចកំណត់អត្តសញ្ញាណរបស់រណ្ដៅអាចម៍ផ្កាយមួយ ដែលមានអាយុកាលចាស់ជាងគេនៅលើពិភពលោក នៅក្នុងប្រទេសអូស្ត្រាលី ហើយវាអាចបកស្រាយពីមូលហេតុដែលនាំឲ្យយុគសម័យទឹកកកនៅលើផែនដីត្រូវបានបញ្ចប់។ ក្រុមអ្នកស្រាវជ្រាវបាននិយាយថា អាចម៍ផ្កាយមួយនេះបានបុកទង្គិចតំបន់ Yarrabubba នៅភាគខាងលិចប្រទេសអូស្ត្រាលី តាំងពី២.២ប៊ីលានឆ្នាំមុន ហើយវាបង្កើតបានជារណ្ដៅអាចម៍ផ្កាយមួយ ដែលមានអាយុប្រហែលពាក់កណ្ដាលនៃអាយុផែនដី។

ការសន្និដ្ឋានរបស់ពួកគេត្រូវបានធ្វើឡើង ដោយការធ្វើតេស្តរកធាតុរ៉ែដែលមាននៅក្នុងថ្មតំបន់នោះ។ អ្នកវិទ្យាសាស្ត្របាននិយាយថា របកគំហើញនេះពិតជាគួរឲ្យរំភើបណាស់ ព្រោះវាអាចពន្យល់ពីស្ថានភាពកម្ដៅក្នុងយុគនោះ។ ការពិតទៅ រណ្ដៅមួយនេះត្រូវបានគេរកឃើញក្នុងតំបន់ក្ដៅស្ងួតតាំងពីឆ្នាំ១៩៧៩មកម្ល៉េះ ប៉ុន្តែអ្នកភូគព្ភវិទូមិនបានធ្វើតេស្តនិងរកអាយុកាលរបស់វាទេ។ អស់រយៈពេលរាប់ប៊ីលានឆ្នាំមកហើយ ស្នាមរណ្ដៅនេះក៏បានរលុបទៅវិញ ដូច្នេះគេពិបាកមើលវាដោយភ្នែកទទេណាស់។ ក្រុមអ្នកវិទ្យាសាស្ត្របានដៅស្លាកស្នាមរណ្ដៅ ក្នុងតំបន់ដែនម៉ាញេទិក ដើម្បីអាចកំណត់អង្កត់ផ្ចឹត៧០គីឡូម៉ែត្ររបស់វា។

លោកសាស្ត្រាចារ្យ Chris Kirkland ដែលជាអ្នកស្រាវជ្រាវបានប្រាប់សារព័ត៌មាន BBC ថា ទិដ្ឋភាពនៅតំបន់នោះមើលទៅរាបស្មើ ដោយសារតែវាមានអាយុកាលយូរពេក ប៉ុន្តែថ្មនៅទីនោះហាក់ដូចជាចម្លែក។ ដើម្បីដឹងពីពេលវេលាដែលអាចម៍ផ្កាយមួយនោះបានបុកផែនដី ក្រុមអ្នកស្រាវជ្រាវបានពិនិត្យគ្រីស្ដាល់តូចៗ zircon និង monazite នៅក្នុងដុំថ្មមួយចំនួន។ គ្រីស្ដាល់ទាំងនោះមានផ្ទុកបរិមាណអ៊ុយរ៉ាញ៉ូមតិចតួច។ ដោយសារតែការបំបែកធាតុអ៊ុយរ៉ាញ៉ូមនាំមុខគេក្នុងល្បឿនមួយថេរ ក្រុមអ្នកស្រាវជ្រាវអាចគណនាថាតើពេលវេលាបានកន្លងផុតយូរប៉ុណ្ណាហើយ។

ជាលទ្ធផល វាមានអាយុកាលចាស់ជាងរណ្ដៅ Vredefort Dome ក្នុងអាហ្វ្រិកខាងត្បូងដល់ទៅ២០០លានឆ្នាំ។ អ្នកវិទ្យាសាស្ត្រជឿជាក់ថា​ ភពផែនដីកាលពីមុនគ្របដណ្ដប់ដោយទឹកកកដែលមានរូបរាងដូចបាល់ទឹកកក។ នៅដំណាក់កាលនេះ ផ្ទាំងទឹកកកចាប់ផ្ដើមរលាយ ហើយភពផែនដីចាប់ផ្ដើមកើនកម្ដៅយ៉ាងឆាប់រហ័ស។ ដូច្នេះផលប៉ះពាល់នៃអាចម៍ផ្កាយបានធ្វើឲ្យមានបម្រែបម្រួលអាកាសធាតុនៅលើផែនដី៕