ចិន៖ ក្រុមហ៊ុន Huawei មានសារមួយផ្ញើទៅកាន់សហរដ្ឋអាមេរិកថា បើទោះជាគ្មានផែនទីរបស់ក្រុមហ៊ុន Google ក៏ខ្លួននៅតែអាចរស់នៅបាន។ ក្រុមហ៊ុនយក្សផលិតស្មាតហ្វូនរបស់ចិនមួយនេះបានឈានដល់កិច្ចព្រមព្រៀងជាមួយក្រុមហ៊ុនបច្ចេកវិទ្យា TomTom ដែលមានទីតាំងនៅប្រទេសហូឡង់។ TomTom នឹងអនុញ្ញាតឲ្យ Huawei ប្រើប្រាស់សេវាកម្មផែនទីរបស់ខ្លួនជាមួយព័ត៌មានទាក់ទងនឹងចរាចរណ៍និងកម្មវិធីស្វែងរកផ្លូវ ដើម្បីយកមកអភិវឌ្ឍជាកម្មវិធីនៅលើទូរសព្ទដៃ Huawei។ កិច្ចព្រមព្រៀងដែលត្រូវបានរាយការណ៍ដោយសារព័ត៌មាន Reuters មានសារៈសំខាន់សម្រាប់ក្រុមហ៊ុន Huawei ពីព្រោះវាមានន័យថាក្រុមហ៊ុនកំពុងចាត់វិធានការបន្ថែមទៀត ដើម្បីកាត់បន្ថយផលប៉ះពាល់នៃការហាមឃាត់ពាណិជ្ជកម្មរបស់អាមេរិក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកាលពីឆ្នាំមុន សហរដ្ឋអាមេរិកបានដាក់ក្រុមហ៊ុន Huawei ទៅក្នុងបញ្ជីខ្មៅរបស់រដ្ឋាភិបាលដែលមានឈ្មោះថា Entity List ដែលរារាំងក្រុមហ៊ុនអាមេរិកទាំងឡាយមិនឲ្យធ្វើអាជីវកម្មជាមួយក្រុមហ៊ុន Huawei ដោយគ្មានអាជ្ញាប័ណ្ណពិសេស។ ជាលទ្ធផល Google បានបញ្ឈប់ក្រុមហ៊ុន Huawei ក្នុងការចូលទៅប្រើប្រាស់ប្រព័ន្ធប្រតិបតិ្តការ Android របស់ខ្លួន ក៏ដូចជាសេវាកម្មកម្មវិធីនិងសេវាកម្មដទៃទៀតដែលជាកម្មសិទ្ធិរបស់ Google រួមទាំងផែនទី Google ផងដែរ។
គួររម្លឹកផងដែរថា Huawei បានពឹងផ្អែកលើ software និងគ្រឿងបន្លាស់របស់អាមេរិក សម្រាប់ស្មាតហ្វូនរបស់ខ្លួន។ ការហាមឃាត់របស់សហរដ្ឋអាមេរិកមិនមែនជាបញ្ហាធំសម្រាប់ក្រុមហ៊ុន Huawei នោះទេ ពីព្រោះក្នុងប្រទេសចិន សេវាកម្មរបស់ Google ត្រូវបានគេរារាំងស្រាប់មកហើយ។ ទោះជាយ៉ាងណាក៏ដោយ វានៅតែជាបញ្ហាសម្រាប់អតិថិជននៅក្រៅប្រទេស ពីព្រោះអ្នកប្រើប្រាស់ភាគច្រើនពឹងផ្អែកលើកម្មវិធីរបស់ Google៕