អាមេរិក៖ លោក អេឡុន ម៉ាសក៍ (Elon Musk) ដែលជាប្រធានក្រុមហ៊ុន SpaceX បានចែករំលែកសារមួយចំនួននៅក្នុងបណ្តាញសង្គមTwitter របស់លោក កាលពីថ្ងៃសុក្រថា "លោកមានគម្រោងចង់បញ្ជូនមនុស្ស ១ លាននាក់ ទៅកាន់ភពព្រះអង្គារ" ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សចក្ខុវិស័យរបស់ ម៉ាសក៍ គឺគាត់ចង់បង្កើតយានអវកាស Starship ឱ្យបាន ១០០គ្រឿង ក្នុងមួយឆ្នាំ ហើយបាញ់បង្ហោះយានទាំងនោះឲ្យបានចំនួន៣គ្រឿងក្នុងមួយថ្ងៃ ដើម្បីអាចបញ្ជូនមនុស្សឲ្យបានដល់គោលដៅប្រមាណ ១លាននាក់ពីភពផែនដីទៅកាន់ភពព្រះអង្គារ។ សំរាប់អ្នកដែលចង់ធ្វើដំណើរតាមយានអវកាសនេះ គឺពួកគេអាចធ្វើដំណើរទៅបាន ព្រោះក្រុមហ៊ុននឹងមានធានាប្រាក់កម្ចីសម្រាប់អ្នកដែលមិនមានប្រាក់គ្រប់គ្រាន់។ លោក ម៉ាសក៍ ក៏បានសរសេរបន្ថែមទៀតថា វានឹងមានការងារគ្រប់គ្រាន់នៅលើភពព្រះអង្គារ ដូច្នេះអ្នកដែលធ្វើដំណើរទៅទីនោះប្រហែលជានឹងអាចធ្វើការដើម្បីសងប្រាក់ដែលពួកគេបានខ្ចីពីក្រុមហ៊ុន។
រៀងរាល់ ២៦ខែម្តង ចម្ងាយរវាងផែនដីនិងភពព្រះអង្គារនឹងខិតមកជិតគ្នាបំផុត។ ដូច្នេះហើយ លោក ម៉ាសក៍ចង់យកឱកាសនេះដឹកជញ្ជូនមនុស្សទៅកាន់ភពព្រះអង្គារ ព្រោះវាចំណាយតិចនិងអាចធ្វើដំណើរបានលឿន។ ហើយគាត់ក៏សង្ឃឹមទៀតថានៅក្នុងរយៈពេល ១០ ឆ្នាំខាងមុខផលិតកម្មនៃយានអវកាសនឹងអាចកើនឡើងពី១០០គ្រឿងដល់ ១០០០គ្រឿងក្នុងមួយឆ្នាំ។
គួរបញ្ជាក់ផងថា ការលើកឡើងរបស់លោក ម៉ាសក៍ ខាងលើនេះបានលាយឡំនឹងភាពកំប្លែងបន្តិច ប៉ុន្តែគំរោងប្រកបដោយមហិច្ឆតារបស់ SpaceX គឺមិនមែនជារឿងលេងសើចនោះទេ។ បើមើលលើផែនការអភិវឌ្ឍ និងគំរូរបស់ SpaceX ដែលត្រូវបានបង្ហាញកាលពីឆ្នាំ២០១៩ រួចទៅហើយនោះ គឺអាចបញ្ជាក់ឱ្យយើងឃើញយ៉ាងច្បាស់ថា វាជាប្រព័ន្ធដឹកជញ្ជូនទៅទីអវកាសដែលមានឥទ្ធិពលបំផុត ព្រោះយានអាវកាសនេះអាចដឹកទំនិញបានប្រមាណ ១០០តោន និងមនុស្ស ១០០នាក់ឡើងទៅទីអវកាសបានក្នុងពេលតែមួយ៕