ទៀតហើយ! ប្រទេសចិនរាយការណ៍ករណីស្លាប់ទី៣ដោយជំងឺម្យ៉ាងស្រដៀងជំងឺសារ​ និងជិត១៤០ករណីថ្មីបានកើតឡើង

ប្រទេសចិនបានរាយការណ៍នៅថ្ងៃច័ន្ទនេះថា ករណីស្លាប់ទី៣ ដែលកើតឡើងពីជម្ងឺថ្មីដ៏អាថ៍កំបាំង និងករណីថ្មីជិត ១៤០ បានរីករាលដាលទៅកាន់ផ្នែកផ្សេងទៀតនៃប្រទេស រួមទាំងទីក្រុងប៉េកាំងផង ដែលកំពុងធ្វើអោយមានការព្រួយបារម្ភយ៉ាងខ្លាំងថាអាចឆ្លងច្រើនជាងនេះ កំឡុងពេលដែលប្រជាជនរាប់លាននាក់កំពុងរៀបចំធ្វើដំណើរសម្រាប់បុណ្យចូលឆ្នាំប្រពៃណីចិន។

ជម្ងឺស្រដៀងជម្ងឺសារនេះ ជាទូទៅអាចបណ្តាលអោយមានជម្ងឺរលាកផ្លូវដង្ហើមផ្នែកខាងលើពីកម្រិតស្រាល ទៅមធ្យម ដូចជាគ្រុនផ្តាសាយធម្មតា ប៉ុន្តែវាក៏អាចប៉ះពាល់ដល់ផ្លូវដង្ហើមផ្នែកខាងក្រោមផងដែរ ដែលអាចបង្កអោយមានជម្ងឺរលាកសួត (pneumonia) ឬជម្ងឺរលាកទងសួត (bronchitis)។

ក្នុងទីក្រុង Wuhan ជាទីក្រុងនៅកណ្តាលប្រទេសចិន ដែលករណីដំបូងកើតឡើង មានករណីថ្មីចំនួន ១៣៦ ត្រូវបានរកឃើញក្នុងសប្តាហ៍នេះ។ យ៉ាងណាព័ត៌មាននេះ គឺយោងទៅតាមគណៈកម្មការសុខភាពក្នុងតំបន់ ដោយមិនប្រាប់ព័ត៌មានលំអិតពីអ្នកដែលបានស្លាប់អោយដឹងនោះទេ។

អាជ្ញាធរផ្នែកសុខាភិបាលនៅទីក្រុងប៉េកាំង ស្រុក Daxing បាននិយាយថា មនុស្សពីរនាក់ដែលបានធ្វើដំណើរទៅទីក្រុង Wuhan កំពុងត្រូវបានគេព្យាបាលជម្ងឺរលាកសួតដែលពាក់ព័ន្ធនឹងវីរុសថ្មីនេះ ហើយក៏បានធូរស្បើយហើយ។

ចំណែកនៅខេត្ត Guangdong​ បុរសនៅស្រុក Shenzhen អាយុ ៦៦ ឆ្នាំម្នាក់ ត្រូវបានដាក់អោយនៅដាច់ដោយឡែកពីគេកាលពីថ្ងៃទី ១១ មករា ក្រោយពីក្តៅខ្លួន និងចេញរោគសញ្ញាផ្សេងៗ បន្ទាប់ពីមកលេងសាច់ញាតិនៅទីក្រុង Wuhan។

គួររំឭកថា មានមនុស្សសរុប ២០១ នាក់ហើយដែលបានឆ្លងវីរុសថ្មីនេះនៅប្រទេសចិន ហើយមនុស្ស ១៧០ នាក់ក្នុងទីក្រុង Wuhan កំពុងត្រូវបានព្យាបាលនៅមន្ទីរពេទ្យ រួមទាំងអ្នកស្ថិតក្នុងស្ថានភាពធ្ងន់ធ្ងរ ៩ នាក់ផងដែរ​ នេះបើយោងទៅតាមគណៈកម្មការសុខាភិបាលក្នុងទីក្រុង។

គួរបញ្ជាក់ផងដែរថា ទីក្រុង Wuhan ជាទីក្រុងដែលមានប្រជាជនរស់នៅ ១១ លាននាក់ ហើយជាក្រុងដ៏សំខាន់សម្រាប់ធ្វើដំណើរ ជាពិសេសកំឡុងពេលចូលឆ្នាំប្រពៃណីចិន ដែលប្រជាជនរាប់រយលាននាក់ត្រូវធ្វើដំណើរឆ្លងកាត់ទៅជួបក្រុមគ្រួសារ។

ជាការកត់សម្គាល់ ករណីមួយចំនួនក៏ត្រូវបានរកឃើញនៅប្រទេសជប៉ុន ថៃ និងសឹង្ហបុរីផងដែរ។ នៅតាមព្រលានយន្តហោះនៅក្នុងតំបន់ ក៏ដូចជាសហរដ្ឋអាមេរិក ក៏កំពុងតាមដានយ៉ាងយកចិត្តទុកដាក់អំពីរឿងនេះ៕

ប្រភព៖ Aljazeera