អាមេរិក៖ បន្ទាប់ពីការទន្ទឹងរង់ចាំអស់រយៈពេលជាច្រើនខែ យានអវកាសសម្រាប់ដឹកមនុស្ស Crew Dragon របស់ក្រុមហ៊ុនអាកាសចរ SpaceX បានឈានដល់ដំណាក់កាលធ្វើតេស្តដ៏សំខាន់ចុងក្រោយរបស់ខ្លួន នៅក្នុងកម្មវិធីសាកល្បងអស់រយៈពេលជាច្រើនឆ្នាំ។ ភាពជោគជ័យបានត្រួសត្រាយផ្លូវសម្រាប់អវកាសយានិក ដើម្បីចាប់ផ្ដើមប្រើប្រាស់វា សម្រាប់ធ្វើដំណើរទៅកាន់ស្ថានីយ៍អវកាសអន្តរជាតិ។ រ៉ុក្កែត Falcon 9 របស់ SpaceX បានផ្ទុកយានអវកាស Crew Dragon នៅពីលើវា ហើយគ្រាប់រ៉ុក្កែតនេះត្រូវបាញ់ចេញដោយគ្មានមនុស្សនៅលើយាន ពីមជ្ឈមណ្ឌលអវកាស Kennedy ក្នុងរដ្ឋផ្លរីដា នៅម៉ោង១០និង៣០នាទីយប់ថ្ងៃអាទិត្យ (ម៉ោងនៅកម្ពុជា)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រហែលជា៨៤វិនាទី បន្ទាប់ពីហោះឡើង យាន Crew Dragon បានផ្ដាច់ខ្លួនចេញពីរ៉ុក្កែតដែលដឹកវា ហើយនេះអាចបញ្ជាក់បានថាវាអាចនាំអ្នកដំណើរទៅកន្លែងមានសុវត្ថិភាព បើសិនជាមានបញ្ហាអ្វីមួយកើតឡើង ក្នុងអំឡុងពេលបាញ់បង្ហោះ។ ការបាញ់បង្ហោះនេះបានចាប់ផ្ដើមឡើងនៅថ្ងៃអាទិត្យ បន្ទាប់ពីមានអាកាសធាតុមិនល្អកាលពីថ្ងៃសៅរ៍ ដែលបង្ខំឲ្យមានការពន្យារពេល២៤ម៉ោង។ ចំណែកលោក Elon Musk ដែលជានាយកប្រតិបត្តិរបស់ក្រុមហ៊ុនអាកាសចរ SpaceX បានឲ្យដឹងថា បេសកកម្មដំបូងរបស់អវកាសយានិកអាចនឹងចាប់ផ្ដើមឡើងឆាប់នៅខែមេសា។
ក្នុងអំឡុងពេលនៃការសាកល្បងហោះហើរកាលពីថ្ងៃអាទិត្យ រ៉ុក្កែត Falcon 9 របស់ SpaceX បានពន្លត់ម៉ាស៊ីនរបស់ខ្លួន បន្ទាប់ឡើងពីដីបានជាង១៦គីឡូម៉ែត្រ ក្នុងល្បឿនយ៉ាងលឿន។ ក្នុងពេលជាមួយគ្នានេះ គម្របក្បាលរ៉ុក្កែតដែលមានផ្ទុកយាន Crew Dragon បានផ្ដាច់ខ្លួនចេញពីតួរ៉ុក្កែត ហើយម៉ាស៊ីនរបស់យានបានបញ្ឆេះឡើងក្នុងរយៈពេលដប់វិនាទី ដើម្បីរុញយានឡើងនិងឆ្ងាយពីរ៉ុក្កែត។ យាន Crew Dragon បានប្រើកម្លាំងរុញច្រានលើយាន ដើម្បីតម្រង់ទិសដៅយាន នៅពេលវាត្រឡប់មកផែនដីវិញ។ ឆ័ត្រយោងពីរឈុតបានបន្ថយល្បឿនរបស់យាន មុនពេលវាធ្លាក់ចូលមហាសមុទ្រអាត្លង់ទិក៕