ភ្នំពេញ៖ ពិតប្រាកដណាស់ថា ដោយសារតែប្រទេសកម្ពុជាយើងជាប្រទេសមួយដែលទទួលនូវឥទ្ធិពលនៃវប្បធម៌បរទេសជាក់ស្តែងដូចជាពិធីបុណ្យចូលឆ្នាំចិននេះតែម្តង។ ដូច្នេះហើយទើបគេឃើញថា នៅពេលដែលពិធីបុណ្យចូលឆ្នាំចិនកាន់តែខិតជិតចូលមកដល់ ដែលមិនសល់ពេលជាងមួយសប្តាហ៍ទៀតនោះទេ ទាំងប្រជាពលរដ្ឋដែលជាខ្មែរសុទ្ធ ឬខ្មែរកាត់ចិន បាននាំគ្នារៀបចំផ្ទះសម្បែង នឹងបានរួសរាន់ទៅជាវទំនិញនិងអីវ៉ាន់ផ្សេងៗពីតាមបណ្តាផ្សារនានា ដើម្បីត្រៀមសម្រាប់ការសែននាពេលខាងមុននេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើយើងងាកមកមើលពីទិដ្ឋភាពទូទៅនៅផ្សារអូឬស្សីវិញ គេក៏ឃើញមានសភាពអ៊ូអរខ្លាំង។ ប្រសិនបើលោកអ្នកធ្វើដំណើរចូលតាមជាន់ផ្ទាល់ដីនៃផ្សារអូឬស្សី លោកអ្នកនឹងឃើញមាននៅការដាក់តាំងលក់នៅគ្រឿងលម្អផ្ទះជាច្រើន ដូចជាគោម អំពូលភ្លើង ក្រដាសអក្សរសំណាងល្អសម្រាប់បិទក្នុងផ្ទះ និងរបស់របរសម្រាប់សែនផ្សេងៗជាច្រើនទៀតយ៉ាងក្រហមច្រាលភ្នែក សម្រាប់ជាការដាក់លក់ត្រៀមក្នុងពិធីបុណ្យចូលឆ្នាំប្រពៃណីចិននាពេលខាងមុខដែលនឹងខិតជិតចូលមកដល់ក្នុងពេលឆាប់ៗនេះហើយ។
បើតាមសម្តីរបស់អាជីករនៅក្នុងផ្សារអូឬស្សីមួយរូបដែលតូបរបស់កញ្ញាក៏មានដាក់លក់នៅទំនិញសព្វគ្រប់ជាច្រើនមុខសម្រាប់ពីធីបុណ្យចូលឆ្នាំចិនខាងមុននេះកញ្ញាក៏បានលើកឡើងផងដែរថា សម្រាប់អីវ៉ាន់ចូលឆ្នាំចិននេះកញ្ញាបានទិញស្តុកទុកលក់មុនប្រហែលជាង២ខែមុនឯណោះ ក៏ព្រោះថាអីវ៉ាន់ទាំងនេះត្រូវចាប់ផ្តើមលក់ក្នុងរយៈពេលមួយខែមុន ប្រសិនបើមិនទិញយកមកស្តុកទុកលក់ជាមុននោះទេ គឺប្រាកដជាលក់ទាន់នោះទេ ពីព្រោះអ្នកទិញខ្លះក៏ពួកគាត់ទិញទុកជាងមួយខែមុនអីដែរ។
ជាមួយគ្នានេះដែរ តាមសម្តីរបស់អាជីវកររូបនេះ ក៏បានបញ្ជាក់បន្ថែមទៀតផងដែរថា ស្របពេលដែលមានអីវ៉ាន់ជាច្រើនបញ្ចេញដាក់លក់លើទីផ្សារត្រៀមសម្រាប់ចូលឆ្នាំចិនខាងមុននេះ តែក៏មានទំនិញមួយចំនួនក៏ត្រូវបានខាងអាជ្ញាធរហាមឃាត់មិនត្រូវបានអនុញ្ញាតឲ្យមានចរាចរដាក់លក់លើទីផ្សារផងដែរ ដូចជា គ្រឿងផ្ទុះ កាំជ្រួច ផាវ ជាដើម។
យ៉ាងណាមិញ ស្របពេលដែលពិធីបុណ្យចូលឆ្នាំចិនកាន់តែខិតជិតចូលមកដល់ គេក៏ឃើញមាននៅទំនិញមួយចំនួនក៏ហាក់មានជាការឡើងថ្លៃផងដែរ។ ជាពិសេសនោះ គឺប្រភេទមុខទំនិញ ដែលបងប្អូនប្រជាពលរដ្ឋមានតម្រូវការច្រើនសម្រាប់ការសែននាពេលខាងមុខនេះ៕