បើសិនជាអាច អ្នកគួរតែបោះចោលកាយវិការទាំង ១០នេះ

ជាទូទៅ យើងទាំងអស់គ្នា ជាពិសេសយុវវ័យមិត្តអ្នកអាន មិនបានចំណាំថាកាយវិការអ្វីដែលយើងបានធ្វើ នៅពេលយើងនៅជាមួយមនុស្សជុំវិញខ្លួនទេ។ ពេលខ្លះយើងមិនបានគិតថាកាយវិការជារឿងសំខាន់ ប៉ុន្តែវាបញ្ជាក់យ៉ាងច្រើនអំពីអារម្មណ៍ និងបុគ្គលិកលក្ខណៈរបស់យើងផងដែរ។ បើអ្នកដឹងថាកាយវិការណាដែលគួរប្រើ ឬមិនគួរប្រើ វានឹងជួយអ្នកច្រើនក្នុងសង្គមសម័យទំនើបនេះ។

តោះ! តើកាយវិការណាខ្លះដែលយើងមិនគួរប្រើ និងគួរបោះចោល? 

១.​ឈរ ឬអង្គុយឱនៗ

 ឥរិយាបថប្រចាំថ្ងៃរបស់អ្នកអាចបញ្ជាក់ច្រើនណាស់អំពីទំនុកចិត្តរបស់អ្នក។ បើអ្នកឈរ ឬអង្គុយបែបឱនៗ វាបង្ហាញថាអ្នកមិនស្រណុកចិត្ត បើអ្នកមិនកែប្រែទេ វានឹងក្លាយជាទម្លាប់មិនល្អ ហើយអ្នកដទៃនឹងគិតថាអ្នកគ្មានទំនុកចិត្តលើខ្លួនឯង។​

២. ខ្វែងដៃ ឬជើង (គងអន្ទាក់ខ្លា)

  អ្នកដឹងទេថា នៅពេលអ្នកនិយាយជាមួយអ្នកដទៃ កាយវិការនេះអាចមើលទៅមិនសមរម្យ។ វាអាចបញ្ជាក់ថា អ្នកមិនបើកចិត្តទូលាយក្នុងការទំនាក់ទំនងជាមួយអ្នកដទៃ ឬចង់ស្តាប់អ្វីដែលគេនិយាយ ឬមិនចូលចិត្តគេតែម្តង។ ប្រសិនបើអ្នកមិនធ្វើបែបនេះ អ្នកនឹងមើលទៅគួរអោយទុកចិត្តសម្រាប់គេជាង។ 

៣.រវើរវាយ (អារម្មណ៍មិននៅក្នុងខ្លួន)

ទោះជានេះជាទម្លាប់របស់អ្នកជាយូរមកហើយ ឬជាអ្វីដែលអ្នកធ្វើនៅពេលអ្នកតានតឹងអារម្មណ៍ អ្នកគួរតែបញ្ឍប់វា។ បើអ្នកលេងសក់ ស្ទាបចិញ្ចៀន ស្ទាបដៃ ជើង ឬតែងតែមើលនាឡិការបស់អ្នកនៅពេលនិយាយគ្នា ឬក្នុងកិច្ចប្រជុំសំខាន់ណាមួយ វាមើលទៅដូចអ្នកកំពុងតែធុញខ្លាំង ហើយចង់ទៅណាផ្សេងវិញ។

៤.ស្ទាប ឬត្រដុសក

ពេលខ្លះ អ្នកស្ទាប ឬត្រដុសករបស់អ្នកដើម្បីកាត់បន្ថយស្ត្រេស ឬក៏ប្រហែលគ្រាន់តែសម្រួលសរសៃបន្តិចបន្តួច។​ ក្នុងករណីនេះ អ្នកគួរតែប្រយ័ត្នប្រយែង ថាអ្នកធ្វើកាយវិការនេះនៅពេលណា ដើម្បីចៀសវាងអ្នកដទៃគិតថាអ្នកកំពុងលាក់បាំងអារម្មណ៍មិនល្អ និងមិនស្រណុកចិត្ត។

៥. ខាំក្រចកដៃ

ទម្លាប់មួយទៀតដែលបង្ហាញអ្នកដទៃថាអ្នកកំពុងភ័យព្រួយ គឺការខាំក្រចកនេះហើយ (មិននិយាយលេងទេណា)។ វាអាចជួយអោយអ្នកកាត់បន្ថយស្រ្តេសបានខ្លះ ប៉ុន្តែវាក៏បង្ហាញពីអារម្មណ៍ដែលអ្នកកំពុងគិតដែរ។ លើសពីនេះទៅទៀត​ វាអាចជារឿងរំខានទៅដល់មនុស្សដែលអ្នកកំពុងនិយាយជាមួយ ហើយវានឹងធ្វើអោយក្រចកអ្នកមិនស្អាតថែមទៀត (ខ្ញុំដឹងថាអ្នកមិនចង់អោយគេវាយតម្លៃអ្នកតាមសម្បកក្រៅទេ)។

៦. ប្រើកែវភ្នែកតិចពេក ឬច្រើនពេក

ការប្រើប្រាស់កែវភ្នែក ជារឿងសំខាន់ បើអ្នកចៀសពីការប្រើកែវភ្នែកនៅពេលទំនាក់ទំនង វាបង្ហាញថាអ្នកមិនមានទំនុកចិត្ត ឬមិនចូលចិត្តគេ ហើយមើលទៅមិនគួរអោយទុកចិត្តទៀតផង។ ផ្ទុយមកវិញ បើសម្លឹងច្រើនពេក ធ្វើអោយគេគិតថាមិនសមរម្យ និងធ្វើអោយគេមិនស្រណុកចិត្ត​ ដូចនេះ​សូមប្រើកែវភ្នែករបស់អ្នកក្នុងកម្រិតសមល្មមមួយ។ 

៧. ងាយបែកអារម្មណ៍

ពេលខ្លះ អ្នកបែកអារម្មណ៍នៅពេលមានអ្នកធុញ ឬពេលខ្លះ មើលទៅអ្នកកំពុងផ្តោតអារម្មណ៍ដែរ តែជាក់ស្តែងអ្នកកំពុងគិតដល់ភពផ្កាយទៅវិញ ធ្វើអោយអ្នកដទៃគិតថាអ្នកមិនស្តាប់គេ។ សូមព្យាយាមស្តាប់អោយច្រើន ដោយសម្លឹងទៅកាន់អ្នកដែលកំពុងនិយាយ ដើម្បីជាការបង្ហាញការគោរព និងចូលរួម។

៨. បញ្ឍរភ្នែក

ការធ្វើបែបនេះ បញ្ជាក់យ៉ាងច្បាស់ថាជាសញ្ញានៃការមិនគោរពគ្នា។ វាអាចមិនមានបញ្ហា បើអ្នកប្រើវាជាមួយមិត្តភក្តិ ដើម្បីបង្ហាញថាអ្នកធុញ ឬមានអារម្មណ៍រំខាន ប៉ុន្តែបើប្រើជាមួយមិត្តរួមការងារ ចៅហ្វាយ ឬអ្នកដទៃវិញ ការធ្វើបែបនេះបង្ហាញពីអាកប្បកិរិយាមិនសមរម្យយ៉ាងធ្ងន់ធ្ងរ។

៩. ភ្លេចញញឹម

ញញឹមច្រើន បង្ហាញពីការបើកចិត្តទូលាយ និងមានទំនុកចិត្ត។ ប៉ុន្តែ ដាច់ខាតកុំញញឹមក្លែងក្លាយ ប្រយ័ត្នអ្នកដទៃគិតថាអ្នកមិនស្មោះត្រង់ និងមិនគួរអោយទុកចិត្ត។

១០. គ្មានកាយវិការ

បើអ្នកនៅតែមួយកន្លែង មិនបញ្ចេញកាយវិការអ្វីសោះ អ្នកដទៃនឹងគិតថាអ្នកមិនចាប់អារម្មណ៍នឹងអ្វីដែលគេកំពុងនិយាយ ឬគិតថាអ្នកមិនស្តាប់គេ។ សូមព្យាយាមបង្ហាញពីអារម្មណ៍ពិតរបស់អ្នក តាមរយៈទឹកមុខ និងកាយវិការល្អៗ ដែលអាចជួយអ្នកក្នុងការសន្ទនាផងដែរ។ 

កាយវិការណាដែលអ្នកកំពុងធ្វើ? តើអ្នកគិតថានឹងបោះចោលកាយវិការណាខ្លះ?

ប្រភព៖ Bright Side