អង់គ្លេស៖ អ្នកចាត់ការទូទៅក្រុមកាំភ្លើងធំ លោក Mikel Arteta បានយល់ឃើញថាខ្សែបម្រើប្រយុទ្ធវ័យ២០ឆ្នាំ Reiss Nelson ជាកីឡាករមានទេពកោសល្យអាចអភិវឌ្ឍន៍សម្ថភាពក្លាយជាកីឡាករកំពូលប្រចាំ Arsenal បាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Nelson ជាយុវជនថ្នាលរបស់ក្រុម Arsenal ដែលត្រូវបានក្លិបតម្លើងឲ្យមកលេងក្នុងឈុតធំ កាលពីខែកក្កដា ឆ្នាំ២០១៩។ ដោយឡែកក្នុងរដូវកាលនេះ រូបគេបង្ហាញខ្លួនសរុបបាន១៥ប្រកួត ស៊ុតបញ្ចូលទីបាន២គ្រាប់ និងបញ្ជូនបាល់ឲ្យមិត្តរួមក្រុមសម្រេចទីបាន២ថង។
កាលពីពេលថ្មីៗនេះ Nelson ត្រូវបានគេប្រៀបធៀបគាត់ទៅនឹងខ្សែបម្រើឆ្នើមកីឡាករ Raheem Sterling ដោយផ្អែកលើហេតុផលថា Arteta អាចជួយអភិវឌ្ឍសម្ថភាពរបស់គាត់ទៅជាកីឡាករកំពូលមួយរូបបាន ដូចដែលគ្រូបង្វឹកសញ្ជាតិអេស្ប៉ាញរូបនេះ ធ្លាប់ជួយបង្វឹក Sterling កាលនៅ Manchester City។
យ៉ាងណាលោក Arteta បានចេញមុខបដិសេធភ្លាមៗ ជុំវិញការប្រៀបធៀបខាងលើនេះ ដោយលោកបាននិយាយថា៖
"ខ្ញុំមិនចង់ប្រៀបធៀបគាត់ទៅនឹង Sterling ទេ ប៉ុន្តែអ្វីដែលខ្ញុំចង់និយាយគឺ Reiss មានសមត្ថភាពគ្របគ្រាន់ក្នុងការធ្វើអ្វីដែលគាត់ចង់។ ប្រសិនបើគាត់ចង់ធ្វើ ចង់រៀន និងចង់យកឈ្នះយកខ្លួនឯង នោះគាត់នឹងអាចឈានដល់ចំណុចកំពូលមួយ ជាកីឡាករកំពូលសម្រាប់ក្លិបមួយនេះ។"
អតីតជំនួយការគ្រូបង្វឹករបស់លោក Pep Guardiola រូបនេះបានបន្តទៀតថា៖
"ខ្ញុំដឹងពីសម្ថភាពរបស់ Reiss ព្រោះខ្ញុំធ្លាប់បង្វឹកគាត់ កាលដែលគាត់មានអាយុ១៦ឆ្នាំ ហើយពេលនោះទម្រង់លេងគាត់ទាក់ភ្នែកខ្ញុំណាស់៕"
ប្រភព៖ caughtoffside
Bong I.T