Roma ស្នើ Liverpool អនុញ្ញាតឲ្យកីឡាកររូបនេះផ្ទេរមកកាន់ទឹកដីអ៉ីតាលី

អ៉ីតាលី៖ យោងតាមសេចក្ដីរាយការណ៍បានឲ្យដឹងថា ក្លិប Roma បានស្នើខ្ចីជើងយកខ្សែបម្រើ Xherdan Shaqiri ពីក្រុមហង្សក្រហម Liverpool។

Roma បច្ចុប្បន្នកំពុងស្វះស្វែងរកកីឡាករ មកជំនួសខ្សែបម្រើប្រយុទ្ធ Nicolò Zaniolo ដែលទំនងជាសម្រាកក្រៅទីលានរហូតដល់បញ្ចប់រដូវកាល បន្ទាប់ពីជម្រើសជាតិអ៊ីតាលីរូបនេះ ជួបបញ្ហារបួសសសៃជង្គង់ (ACL) ។

ក្នុងនោះដែរក្រុម Roma បានដាក់ខ្សែការពារស្លាបស្ដាំរបស់ខ្លួនកីឡាករ Leonardo Spinazzola ក្នុងកិច្ចព្រមព្រៀងដើម្បីដោះដូរយកខ្សែប្រយុទ្ធក្រុម Inter Milan កីឡាករ Matteo Politano ដើម្បីមកជំនួសកន្លែងកីឡាករ Zaniolo ប៉ុន្តែការចរចាហាក់បរាជ័យ។

ដោយពេលនេះពួកគេបានបង្វែរទិសដៅទៅលើខ្សែបម្រើប្រយុទ្ធក្រុម Liverpool កីឡាករ Sahaqiri វិញម្ដង។ យោងតាមការចុះផ្សាយរបស់កាសែត Sky Sport Italia ក្រុម Roma បានស្នើក្រុមហង្សក្រហមខ្ចីជើងយកជម្រើសជាតិស្វីស Shaqiri ជាមួយជម្រើសក្នុងការទិញផ្ដាច់នៅពេលបញ្ចប់រដូវកាល។

គួរឲ្យដឹងដែរថា ប្រសិនបើ Liverpool យល់ព្រមនឹងសំណើខាងលើ នោះអាចជាការវិលត្រឡប់របស់ខ្សែបម្រើប្រយុទ្ធវ័យ២៨ឆ្នាំ ក្នុងការទៅលេងនៅ Serie A ដោយរូបគេធ្លាប់លេងឲ្យក្រុម Inter Milan កាលពីឆ្នាំ២០១៥៕

ប្រភព៖ football-italia