ប្រទះឃើញក្រុមអង្គចម្លែកដែលបណ្ដែតខ្លួនក្បែរប្រហោងខ្មៅរបស់កាឡាក់ស៊ីមីលគីវ៉េ

បរទេស៖ នៅចំណុចកណ្ដាលកាឡាក់ស៊ីមីលគីវ៉េរបស់យើង នៅតែជាកន្លែងមួយដ៏អាថ៌កំបាំង។ គេពិបាកពិនិត្យមើលវាខ្លាំងណាស់ ដោយសារតែមានឧស្ម័នពពកនិងធូលីនៅដៃគូទខ្យងនៃកាឡាក់ស៊ី។ ប៉ុន្តែទិន្នន័យរលកពន្លឺអាំងប្រាជិតដែលទទួលបានពីមន្ទីរអង្កេតតារាសាស្ត្រ  W. M. Keck Observatory នៅលើកោះហាវ៉ៃ អាចចាប់បានទិដ្ឋភាពពិតដ៏ចម្លែកនៅពីក្រោយអ័ព្ទ។ ប្រហោងខ្មៅដ៏ធំសម្បើមនៅតំបន់ Sagittarius A ដែលជាចំណុចកណ្ដាលនៃកាឡាក់ស៊ីមីលគីវ៉េ គឺកំពុងបញ្ចេញលក្ខណៈយ៉ាងចម្លែក និងស្រូបលេបអ្វីៗមិនចេះឆ្អែតឆ្អន់។ ហើយឥឡូវនេះ ក្រុមតារាវិទូបានប្រទះឃើញក្រុមអង្គចម្លែកថ្មីមួយនៅមិនឆ្ងាយពីប្រហោងខ្មៅ នេះបើយោងតាមការសិក្សានិងចេញផ្សាយនៅថ្ងៃពុធ នៅក្នុងទិនានុប្បវត្តិមានឈ្មោះថា Nature។

បើតាមសម្ដីអ្នកស្រី Andrea Ghez ដែលជាអ្នកនិពន្ធការសិក្សាបានឲ្យដឹងថា អង្គទាំងនេះមើលទៅហាក់ដូចជាឧស្ម័នហើយបញ្ចេញលក្ខណៈដូចជាផ្កាយឯទៀត។ ជាធម្មតា អង្គទាំងនេះទំនងជាហាប់ណែន ប៉ុន្តែពួកវាបានលាតសន្ធឹងត្រដាងនៅពេលចូលទៅក្បែរប្រហោងខ្មៅ ទៅតាមគន្លងគោចរដែលមានរយៈពេលចាប់ពី ១០០ទៅ១,០០០ឆ្នាំ។ អង្គដំបូងគេដែលត្រូវបានគេរកឃើញនៅចំណុចកណ្ដាលកាឡាក់ស៊ីមីលគីវ៉េតាំងពីឆ្នាំ២០០៥ ត្រូវបានគេដាក់ឈ្មោះឲ្យថា G1 និងនៅឆ្នាំ២០១២ គេរកឃើញអង្គទី២ ហើយត្រូវបានគេដាក់ឈ្មោះឲ្យថា G2។ ឥឡូវនេះក្រុមស្រាវជ្រាវរបស់អ្នកស្រី Ghez បានរកឃើញអង្គចំនួន៤បន្ថែមទៀត និងបានកំណត់គន្លងគោចររបស់វាដូចជា G3, G4, G5, និង G6៕