ភ្នំពេញ៖ ជើងឯករងកាលពីព្រឹត្តិការណ៍មុន វៀតណាម បានត្រឹមធ្លាក់ក្នុងវគ្គចែកពូលពានរង្វាន់ 2020 AFC U-23 Championship ក្រោយប្រកួតចាញ់កូរ៉េខាងជើង ក្នុងលទ្ធផល ១ទល់នឹង២ កាលពីយប់មិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងការប្រកួតបិទបញ្ចប់ពូល D វៀតណាម ត្រូវការឈ្នះដាច់ខាតដើម្បីធានាកៅអីឡើងទៅកាន់វគ្គបន្ត ខណៈកូរ៉េខាងជើងធ្លាក់ដោយស្វ័យប្រវត្តិ។ យ៉ាងណាមិញ បើទោះបីជាធ្លាក់ស្វ័យប្រវត្តិក៏ដោយប៉ុន្តែ កូរ៉េខាងជើង បានយកឈ្នះ វៀតណាម និងបានធ្វើឲ្យក្រុមមកពីអាស៊ីអាគ្នេយ៍មួយនេះត្រឹមវគ្គចែកពូល។
វៀតណាម ជាអ្នកស៊ុតគ្រាប់បាល់នាំមុខមុន នៅនាទីទី១៦ ដោយកីឡាករ Nguyen Tien Linh។ យ៉ាងណាមិញ កូរ៉េខាងជើងបានវាយបកយកឈ្នះវិញ ២គ្រាប់ដោយការធ្វើឲ្យចូលទីខ្លួនឯងរបស់អ្នកចាំទីវៀតណាម Bui Tien Dung នៅនាទីទី២៧ និងការទាត់បាល់ពិន័យ ១១ម៉ែត្ររបស់កីឡាករ Chung-Gyu Ri នៅក្នុងម៉ោងបន្ថែមវគ្គទី២។
ចំណែកឯលទ្ធផលមួយគូទៀតក្នុងពូល D ជាមួយគ្នានេះគឺអារ៉ាប់រួម ស្មើគ្នាជាមួយហ្សកដានី ក្នុងលទ្ធផល ១ទល់នឹង១ និងគឺជាក្រុមទាំងពីរក្នុងពូល D ដែលបានឡើងទៅកាន់វគ្គ ៨ក្រុមចុងក្រោយ។
គួរឲ្យដឹងដែរថា ក្រុមទាំង៨ ដែលបានឡើងទៅកាន់វគ្គបន្តសម្រាប់ព្រឹត្តិការណ៍ 2020 AFC U-23 Championships រួមមាន ម្ចាស់ផ្ទះថៃ, អូស្រ្តាលី, អារ៉ាប៊ីសាអូឌីត, ស៊ីរី, អ៊ូសបេគីស្ថាន, អារ៉ាប់រួម និង ហ្សកដានី៕
ចង់ឃើញថា ការប្រកួតដែល កូរ៉េខាងជើងទាញ វៀតណាម ធ្លាក់ទៅជាមួយគ្នាយ៉ាងណានោះ ទៅទស្សនាវីដេអូខាងក្រោមទាំងអស់គ្នា៖