ទើបតែប្រកាសកាលពីប៉ុន្មានថ្ងៃមុនសោះ ឥឡូវមានអ្នកដាក់ពាក្យឈានដល់ចំនួនពីរម៉ឺននាក់ ដើម្បីប្រកួតប្រជែងនិងក្លាយជាគូស្នេហ៍របស់មហាសេដ្ឋីជប៉ុន

ជប៉ុន៖ សេវាកម្មចាក់ផ្សាយតាមទូរទស្សន៍អនឡាញ AbemaTV បាននិយាយកាលពីម្សិលមិញថា មានបេក្ខនារីដាក់ពាក្យដើម្បីក្លាយជាមិត្តស្រីមហាសេដ្ឋីជប៉ុន យឹសាគឹ មេសាវ៉ា បានឈានដល់ចំនួន២០,០០០នាក់។ ឥឡូវនេះ គេហទំព័ររបស់កម្មវិធីបានបន្ថែមការធ្វើតេស្តក្ដីស្នេហ៍ ដែលអនុញ្ញាតឲ្យអ្នកចូលរួមប្រកួតធ្វើតេស្តភាពចុះសម្រុងរវាងគ្នានឹងគ្នាជាមួយលោក មេសាវ៉ា ហើយរួមបញ្ចូលទាំងសំនួរពហុជ្រើសរើសផងដែរ។

គួររម្លឹកផងដែរថា កម្មវិធីមួយនេះបានបើកឱកាសសម្រាប់នារីៗអាយុចាប់ពី២០ឆ្នាំដែលមានភាពវៃឆ្លាត ចូលចិត្តការសប្បាយៗសម្រាប់ជីវិត និងចង់បានសន្តិភាព។ លើសពីនេះទៅទៀត ពួកគេត្រូវមានចំណាប់អារម្មណ៍ក្នុងការធ្វើដំណើរទៅកាន់ទីអវកាសផងដែរ។ លោក មេសាវ៉ា គឺជាភ្ញៀវម្នាក់ក្នុងចំណោមមនុស្សឯទៀតដែលនឹងត្រូវធ្វើដំណើរទៅកាន់ឋានព្រះចន្ទ តាមរយៈការហោះហើរជាលើកដំបូងរបស់ក្រុមហ៊ុន SpaceX នៅឆ្នាំ២០២៣។ ហើយគាត់ក៏ចង់បានដៃគូម្នាក់​ ដើម្បីធ្វើដំណើរទៅឋានព្រះចន្ទជាមួយគ្នាផងដែរ។ ចំពោះអ្នកដែលទទួលបានជ័យលាភីក្នុងកម្មវិធីប្រកួតប្រជែង នឹងត្រូវប្រកាសនៅបំណាច់ខែមីនា ខាងមុខនេះ៕