ប៉ាម៉ាក់គ្រប់រូបគួរតែចាប់ផ្ដើមបង្រៀនកូនៗរបស់ខ្លួនឲ្យមានទម្លាប់ល្អចំពោះសុខភាពរបស់ពួកគេឲ្យបានឆាប់តាមដែលអាចធ្វើបាន ព្រោះវិធីនេះអាចជួយឲ្យកូនរៗរស់នៅមានសុខភាពល្អយូរអង្វែងទៅថ្ងៃអនាគត។ ប៉ាម៉ាក់ទាំងឡាយអាចណែនាំឲ្យកូនៗចេះថ្លឹងថ្លែងលើចំណីអាហារដែលគេញ៉ាំ និងវិធីលំហាត់ប្រាណ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- ប៉ាម៉ាក់គឺជាគំរូល្អដល់កូនៗ
ក្មេងៗភាគច្រើនគឺមើលឃើញនិងធ្វើត្រាប់តាមប៉ាម៉ាក់របស់គេ ហើយដើរតាមផ្លូវដែលប៉ាម៉ាក់របស់គេធ្លាប់ដើរ។ ប្រសិនបើកូនក្មេងឃើញប៉ាម៉ាក់របស់គេញ៉ាំអាហារ និងហាត់ប្រាណបានត្រឹមត្រូវ នោះគេនឹងធ្វើតាមដែរ។ ហើយគេថែមទាំងអាចដឹងបានថែមទៀតថា សុខភាពល្អគឺពិតជាសំខាន់ណាស់។ ធ្វើសកម្មភាពបន្តិចម្ដងៗ និងការផ្លាស់ប្ដូរយឺតៗ គឺអាចបណ្ដាលឲ្យមានការផ្លាស់ប្ដូរបញ្ហាសុខភាពនៅក្នុងរង្វង់គ្រួសាររបស់យើងនៅថ្ងៃខាងមុខ។
២- ប្រកាន់ភ្ជាប់គំនិតវិជ្ជមាន
ក្មេងភាគច្រើនចង់ឮពាក្យសរសើ និងលើកទឹកចិត្ត ហើយនិយាយទៅកាន់ពួកគេថា កូនធ្វើបានល្អណាស់។ ការលើកទឹកចិត្ត និងអបអរភាពជោគជ័យរបស់ក្មេងៗ អាចជួយឲ្យពួកគេចាប់ផ្ដើមមានភាពជឿជាក់ និងមានគំនិតវិជ្ជមាន។ ប៉ាម៉ាក់អាចជួយឲ្យកូនៗមានភាពជឿជាក់លើសុខភាពរបស់ពួកគេ ដោយបង្រៀនពួកគេថាគេគួរឲ្យស្រលាញ់ មានសមត្ថភាពខ្ពស់ និងខុសប្លែកពីក្មេងដទៃ។
៣- លំហាត់ប្រាណ
ការធ្វើលំហាត់ប្រាណ អាចជួយដល់ការលូតលាស់របស់ក្មេង ទាំងរាងកាយ និងចិត្តគំនិតរបស់ពួកគេ។ ម៉ាក់ប៉ាគ្រប់រូបគួរតែអនុញ្ញាតឲ្យកូនៗចូលរួមសកម្មភាពផ្សេងៗ រហូតដល់ពួកគេបានជួបកីឡាណាមួយដែលសក្តិសមជាមួយពួកគេ។ ក្មេងម្នាក់ៗគឺមានទម្លាប់ខុសៗគ្នា ហើយពួកគេនឹងលេងយ៉ាងសប្បាយ ប្រសិនបើគេចូលចិត្តកីឡាណាមួយហើយនោះ។
៤- ចំណាយពេលជាមួយគ្រួសារ និងមិត្តភក្តិ
សម្រាប់គ្រួសារដែលរវល់ច្រើន គឺពិតជាមានភាពលំបាកសូម្បីតែរកពេលហូបបាយល្ងាចជុំគ្នាជាមួយក្រុមគ្រួសារ។ ប៉ុន្តែវាជារឿងចាំបាច់ ប្រសិនបើប៉ាម៉ាក់គ្រប់រូបចង់រក្សាចំណងគ្រួសារឲ្យនៅរឹងមាំ។ នៅពេលញ៉ាំអីជុំគ្នា នោះក្មេងៗនឹងមិនងាយញ៉ាំអាហារខុស ឬអាហារផ្ដេសផ្ដាស់បានឡើយ។ ដូចនេះហើយពួកគេនឹងមិនប្រឈមមុខខ្លាំងជាមួយបញ្ហាឡើងគីឡូលើសទម្ងន់ឡើយ។
ក្នុងក្រុមគ្រួសារយើងអាចរៀបគម្រោងផ្សេងៗដូចជា ដើរហាត់ប្រាណជុំគ្នា ជិះកង់ ហែលទឹកជាដើម។ ការធ្វើបែបនេះ សមាជិកទាំងអស់ក្នុងគ្រួសារ នឹងទទួលបានប្រយោជន៍ពីការហាត់ប្រាណ ក៏ដូចជារីករាយជាមួយការជួបជុំគ្រួសារ។
មិត្ដភក្ដិ ក៏ចូលរួមចំណែកសំខាន់ក្នុងការជួយដល់ការលូតលាស់សុខភាពរបស់ក្មេងៗបានដូចគ្នា។ ក្មេងៗលេងជាមួយគ្នាអាចបង្រៀនពួកគេឲ្យស្គាល់ពីតម្លៃសង្គម ដូចជាការទំនាក់ទំនង ធ្វើការជាក្រុម និងចេះដោះស្រាយបញ្ហាជាមួយគ្នា។ ប៉ាម៉ាក់គ្រប់រូបគួរតែលើកទឹកចិត្តកូនៗរបស់ខ្លួនឲ្យទៅលេងជាមួយមិត្ដភក្ដិគរបស់ពួកគេ ជាជាងឲ្យកូនរបស់អ្នកសំងំនៅក្នុងបន្ទប់តែម្នាក់ឯង។
៥- កំណត់ពេលមើលទូរទស្សន៍ និងកុំព្យូទ័រ
ក្មេងៗគ្រប់រូបមិនគួរមើលទូរទស្សន៍ និងលេងហ្គេមលើសពី ២ម៉ោងក្នុងមួយថ្ងៃឡើយ។ ទម្លាប់អាក្រក់ទាំងអស់នេះអាចធ្វើឲ្យក្មេងប្រឈមមុខជាមួយបញ្ហាធាត់លើសទម្ងន់ និងជំងឺបេះដូងសរសៃឈាមបាន។ ប៉ាម៉ាក់គួរតែចេះគ្រប់គ្រងអាហារ និងនំចំណីពេលកូនៗមើលទូរទស្សន៍។ ការញ៉ាំអីពេលមើលទូរទស្សន៍ អាចធ្វើឲ្យក្មេងញ៉ាំមិនមានអារម្មណ៍ឆ្អែត ដែលអាចបណ្ដាលឲ្យពួកគេញ៉ាំលើសកំណត់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet